Үөрэх дьыла саҕаланан, оскуолабыт барахсан оҕо–аймах саҥатынан чугдаарыйа туолла. Сайынын астына оонньоон, дуоһуйа үлэлээн, көрдөөхтүк сынньаммыт, саҥа күүс мунньуммут үөрэнээччилэр балаҕан ыйын маҥнайгы күнүгэр чуҥкуйбут оскуолаларын аанын аһан, үөрэхтэрин саҕалаатылар.
Ол гынан баран, билигин дойду үрдүнэн ыарахан кэм турар буолан, линейкабыт уруккутааҕар дьиктитик, уратытык ааста.
Биллэрбиттэринэн, маҥнайгы кэмҥэ сорох кылаастар дьиэлэригэр олорон үөрэниэхтэрэ. Ол эрээри санаабытын түһэрбэккэ, бары үтүөнү эрэ ыралаан, инникибит диэки эрэллээхтик хаамыахха.
Биһиги, оскуоланы бүтэрээччилэр, ыра буолбакка, баҕабыт, сыалбыт — биир кэлим эксээмэннэргэ үчүгэйдик бэлэмнэнэн, туйгуннук туттарыы. Уонна бу оскуолатааҕы бүтэһик сылбыт умнуллубаттык, чаҕылхайдык ааһарын күүтэбит.
Дойдубут үөрэҕириитин салалтата билиҥҥи уустук кэми өйдөөн, үөрэнээччилэргэ наһаа элбэх саҥа, ыарахан сорудахтары киллэрбэттэрэ уонна, сүрүнэ, билигин сабардаабыт коронавирус дьаҥа этэҥҥэ ааһара буоллар диэн баҕалаахпыт.
Ааптар: Эльдар Садовников, «Элгэс эрэллэрэ” эдкорпост.
Сыаҥааннаах, Абый.