Тихон Михайлович Каженкин аатынан Арыылаах орто оскуолата 2021 сылтан экологическай хайысхалаах буолан, араас тэрээһиннэргэ, үлэлэргэ көхтөөхтүк кыттабыт. Экология, айылҕа баайын туһаныы уонна ойуур хаһаайстыбатынан министиэристибэтин, Чурапчы спорт институтун, М.К. Аммосов аатынан университеты, Мельников аатынан ирбэт тоҥу үөрэтэр институту, Чурапчытааҕы ойуур хаһаайыстыбатын кытта сөбүлэҥ түһэрсэн бииргэ үлэлиибит.
Биһиэхэ онно научнай консультаннарынан ХИФУ-ттан педагогическай наука кандидата, доцент Любовь Семеновна Пахомова, ирбэт тоҥу үөрэтэр институт үлэһитэ Николай Ильич Башарин уонна бэйэбит биир дойдулаахпыт биологическай наука кандидата Семен Романович Попов буолаллар.
Ыам ыйын 12 күнүгэр, «Зеленая Россия» «Международный день экологических знаний» чэрчитинэн, оҕолорго «Зеленые пионеры» пионерскай этэрээт тэрилиннэ. IV-VIII кылаас оҕолорун пионерга ыллыбыт. Бу кэнники сылларга оскуолаҕа бастакы пионерскай тэрилтэ буолар. Үөрүүлээх тэрээһиҥҥэ мустан, бэлиэ күнү тэрийдибит. Пионерга киирээччилэр кэс тылларын этэн, горн, барабан тыаһынан доҕуһуоллатан строевой хаамыыны көрдөрдүлэр.
Мария Демьянова этэрээти хамаандалаата, Алексей Демьянов знамя тутар чиэскэ тигистэ. Барабанщик – Иван Попов уонна горнист – Дьулустаан Христофоров. Оҕолорго күөх хаалтыһы урукку пионер баһаатайдар, пионер бэтэрээннэр 28 оҕоҕо долгутуулаах түгэҥҥэ баайдылар. Пионерскай тэрилтэ оҕолоро айылҕаны харыстыырга, чөлүгэр түһэрэргэ үлэлиэхтэрэ, араас тэрээһиннэргэ кыттыахтара, кыра оҕолорго холобур буолуохтара. Быйылгы үлэбит былаанынан көҕөрдүү үлэтэ, маһы олордуу ыытыллыаҕа.
Бэлэмнээтэ оскуола бибилэтиэкэрэ Ньургуйаана Сыромятникова.