«Зарница» — урукку кэмтэн кэлбит спортивнай оонньуу буолар. Ордук оҕо-аймах, эдэр ыччат сөбүлээн оонньуур.
Оҕолор хамаандаларга арахсан, байыаннай үөрэххэ чугас оонньууларга кытталлар: мэһэйдээх сирдэри туорууллар, сыыллаллар, сыал ыталлар, бастакы көмөнү оҥороллор, миинэ көрдүүллэр… Оонньууга баралларыгар компаһынан сирдэтэн, хайысханы быһааран, сөптөөх сиргэ тиийэллэр, онно лааҕыр тэринэллэр. Бу барыта оҕоттон түргэн-тарҕан туттууну, сөптөөх быһаарыныыны, булугас өйү, бииргэ буолууну ирдиир. Онон «Зарница» оҕону бары өттүнэн сайыннарар оонньуу буолар.
Ыам ыйын 21 күнүгэр Е.М. Ларионов аатынан Салбаҥ орто оскуолатыгар «Зарница-2022» спортивнай оонньуу буолан ааста. Оскуола оҕолоро үс хамаандаҕа арахсан «Спанч Боб» (хамандыыр Илья Винокуров, XI кылаас), «Кыһыл Күн» (хамандыыр Тихон Семенов, XI кылаас), «Элдийцы» (хамандыыр Роберт Голиков, IX кылаас) эрдэттэн бэлэмнэнэн, күөн көрүстүлэр, күрэс былдьастылар.
Бастаан старт бэриллэн, хамаанда оҕото барыта «Зарница» буолуохтаах Таас алааска диэри кылаат көрдүү-көрдүү түһүммүппүт. Бастакынан «Спанч Боб» хамаандата тиийбитэ. Салгыы ордууну оҥостуу, палатканы туруоруу, ону тэҥинэн «Бастыҥ хаһыат», «Бастыҥ асчыттар» күрэхтэрэ саҕаламмыттара. Хаһыат оҥорооччулар кылгас кэм иһигэр «Зарница» историятын, Ньукуолун бырааһынньыгын бэрт дьэрэкээнник уруһуйдаан, баай ис хоһоонноон сырдаппыттара. Билиҥҥи ирдэбилинэн, уот оттор бобуулааҕынан, оҕолор дьиэлэриттэн аҕалбыт астарынан повардар «ЯАССР 100 сыла» диэн тиэмэҕэ композиция оҥорбуттара.
Эбиэт кэннэ «Зарницабыт» үөрүүлээх аһыллыыта буолбута. Хамандыырдар Сахабыт сирин былааҕын өрө күөрэппиттэрэ, хамаандалар бэйэлэрин билиһиннэрбиттэрэ, тоҕо итинник ааттаммыттарын быһаарбыттара. Онтон тыҥааһыннаах, өрө күүрүүлээх «Полоса препятствий» саҕаламмыта. Онно хамаандаттан алта оҕо сүүрбүтэ, ону тэҥэ санитар носилкатын тутан сүүрсүбүтэ. Үрдүк истиэнэни өрө тахсыы, ойуур быыһынан сүүрүү, троһунан хаамыы, паутинаны ааһыы, маһы суулларбакка аннынан сыыллыы, чөҥөчөх мастар үрдүлэринэн хаамыы, мэһэйдээх истиэнэни тахсыы, сыал ытыы, ууга түспэккэ далаһаны ааһыы, бүтэһиккэ санитар биир оҕону бэрэбээскилиирэ, ыйытыктарга эппиэттиирэ, бастакы көмө оҥоһуллубут оҕотун икки улахан оҕо носилканан биэтэккэ илдьиилэрэ, хамаанда оҕото противогаз кэтэн биэтэккэ кэлиилэрэ тыҥааһыннаахтык ааста. Манна ураты техникатынан, хамандыыр салайыыта күүстээҕинэн «Спанч Боб» хамаанда инники тахсыбыта. Онтон сапердар, хамандыырдар күрэхтэрэ саҕаламмыта. Хамаандаттан биирдии сапер бэлэмнэнэн кэлэн, ууга кистэммит миинэлэри көрдөөбүттэрэ. Хамандыырдар сүүрбүттэрэ, Калашников автоматы ыспыттара, таҥмыттара, маҕаһыыныгар ботуруоннарын укпуттара уонна ыйытыыларга хоруйдаабыттара. Бириэмэтэ үчүгэйинэн, эппиэттиирэ эҥкилинэн «Кыһыл Күн» хамандыыра Тихон Семенов бастыыры ситиспитэ. Икки улахан киирсии буолбута: «Погон былдьаһыыта», «Былаах былдьаһыыта». Манна тактика арааһа, стратегия сүрдээҕэ баара. Түмүккэ III миэстэни «Элдийцы», II «Кыһыл Күн» уонна бастыыры «Спанч Боб» хамаандалара ситиспиттэрэ.
Айылҕаҕа тахсан сынньанан, оонньоон-көрүлээн, оҕо-аймах үөрэх дьылын түмүктээтэ. Онтон выпускниктар күүс-сэниэ ыллыбыт, аны аҕыйах күнүнэн эксээмэннэрбит саҕаланыахтара.
Дарина БАИШЕВА,
Нам улууһун Е.М. Ларионов аатынан Салбаҥ орто оскуолатын XI кылааһын үөрэнээччитэ.