Кулун тутар 21 күнүгэр биһиги оскуолабытыгар «Зарница 2.0» военнай патриотическай оонньуу муниципальнай түһүмэҕэ үрдүк таһымнаахтык буолан ааста. Бу күрэххэ улууспут уопсайа 11 оскуолатын хамаандалара мустан, бэйэлэрин дьоҕурдарын, хорсун санааларын уонна билиилэрин-көрүүлэрин көрдөрдүлэр.
Биһиги оскуолабытыттан бу оонньууга VI кылаас оҕолоро кыттыыны ыллылар. Кинилэр хамаандалара хас да күнү быһа, сыралаһан бэлэмнэнэн, бэйэлэрин дьоһуннаахтык көрдөрдүлэр. Түмүккэ, оҕолорбут ситиһиилэрэ маннык буолла:
• Военкордар конкурстарыгар – I миэстэ!
• Военизированнай эстафетаҕа – III миэстэ!
Оонньуу сүрүн сыаллара: «Зарница 2.0» сүрүн сыала – эдэр ыччаты төрөөбүт дойдуга таптыырга, бэйэ дойдутун харыстааһыҥҥа, бэрээдэги тутуһууга уонна эппиэтинэстээх буолууга иитии. Оонньуу оҕону бэйэ-бэйэни өйөһөргө, хамаанданан үлэлииргэ уонна экстремальнай усулуобуйаҕа сөптөөх быһаарыныыны ылынарга үөрэтэр.
Оонньуу түһүмэхтэрэ: Күрэх хас да ыарахан, ол эрэн интэриэһинэй түһүмэхтэрдээх этэ:
1) Строевой бэлэмнэнии: хамаанданы биир тылынан салайыы, састаап бэрээдэгэ.
2) Военизированнай эстафета: куотуу, мэһэйи туорааһын, байыаннай-прикладной сатабыллары көрдөрүү.
3) Военкордар конкурстара: түгэннэри хаартыскаҕа, видеоҕа түһэрии уонна сырдатыы.
4) Медицинскай көмө: бааһырыыны таба көрүү, биирдиилээн көмөнү оҥоруу уонна ыарыһаҕы таһаарыы.
Бу курдук дьоһуннаах оонньууга кыттыбыт, оскуолабыт аатын ааттаппыт VI кылаас оҕолоругар улахан махталбытын тиэрдэбит! Эһиги бэйэҕит хорсун быһыыгытынан, түмсүүгүтүнэн уонна дьулуургутунан киэн туттабыт.
Кыттааччыларга баҕарабыт: инникитин даҕаны бэйэҕит күүскэ итэҕэйиҥ, үөрэххитигэр, спортка уонна олоххутугар үрдүк ситиһиилэри! Доруобай, дьоллоох, хорсун-хоодуот буолуҥ! Эһиги – биһиги кэлэр кэскилбит!
«Этиҥ» медиа киин, Ой орто оскуолата