Бу күннэргэ саҥа үөрэх дьылын биир сүрүн тэрээһининэн оскуолабыт лидерин талыы буолла. Ол иннинэ кандидаттар бэйэлэрин үлэлэрин, былааннарын, соруктарын туһунан үөрэнээччилэргэ, оскуола үлэһиттэригэр билиһиннэрбиттэрэ.
Уопсайа үс үөрэнээччи бэйэтин кандидатуратын туруорунна: Алик Тимофеев, X кылаас; Ринат Ларионов, IX кылаас; Снежанна Готовцева, IX кылаас.
Быыбар күн уопсайа 105 куоластааччы кыттыыны ылла. Барыта быыбар ирдэнэр хаамыытынан барда. Хас биирдии быыбардааччы анаммыт сиргэ бюллетень толорон, бэйэбит кандидаппытыгар куоласпытын биэрдибит.
Онтон түмүк балаҕан ыйын 22 күнүгэр саҥа үөрэх нэдиэлэтин арыйар линейкаҕа билиннэ. Бары да түмүгү билэ охсоору долгуйдубут. Куоластааһын түмүгэ маннык буолла: Алик Тимофеев — 16% куолаһы ылла, Ринат Ларионов — 26%, Снежанна Готовцева — 58%.
Онон баһыйар элбэх куолаһы ылан, оскуолабыт лидеринэн Снежанна Готовцева талылынна.
Снежанна быыбар иннинээҕи программата олус киэҥ, дириҥ ис хоһоонноох, интэриэһинэй. Оскуола иһинэн радио үлэлэтии, баҕа санаа дьааһыгын оҥоруу, хас понедельник аайы старостат, сүбэ мунньахтары тэрийэн ыытыы, оҕолор интэриэстэрин, баҕаларын учуоттаан тематическай тэрэһиннэрии оҥоруу, волонтерскай акцияларга кыттыыны ылыы, оскуола үөрэнээччилэрэ научнай-практическай конференцияларга, олимпиадаларга кыттыыларын үрдэтии, оҕолор ортолоругар чөл олоҕу күүскэ көҕүлээһин, коммунарскай сбордарга кыттыы, оскуола медиа-киинин үлэтин саҥа таһымҥа таһааран сайыннарыы — бу барыта биһиги саҥа лидербит үлэтигэр көрөр сүрүн хайысхалара.
Снежанна Готовцева «Байаҕантай кэскиллэрэ» медиа-киин, «Кэскил» медиа-оскуола юнкора. Быйыл сайын Н.Е. Мординов-Амма Аччыгыйа аатынан «Кэскил» оҕо бэчээтин кыһатын бастыҥ юнкора буолан Тааттаҕа ыытыллыбыт «Манчаары оонньууларын» сырдатыытыгар үлэлээбитэ.
Салгыы 21 хонуктаах «Төрүччү» лааҕырыгар наставник-юнкор быһыытынан дьарыктаммыта.
Онон үлэни тэрийиигэ, сырдатыыга, дьону кытта сөптөөхтүк алтыһыыга уопуттаах.
Оскуолабыт саҥа лидеригэр ситиһиилэри баҕарабыт.
Валерия ГОТОВЦЕВА, XI кылаас,
М.Н. Готовцев аатынан Танда орто оскуолата, Уус Алдан
Ааптар хаартыскалара