Билигин оҕо-аймах, ыччат ортотугар успорт эйгэтэ олус сайдан турар. Успуорт күүстээх санааны, чэгиэн туругу, чөл олоҕу өрө тутар. Ол кэрэһитэ Таатта улууһун килбэйэр киинигэр Ытык Күөлгэ от ыйын 8 күнүгэр Алексей Егорович Турнин аатынан саҥа успуорт дыбарыаһа арыллыыта буолар.
Баараҕай тутуулаах саҥа успуорт дыбарыаһын Саха Өрөспүүбүлүкэтин Ил Дархана Айсен Сергеевич Николаев үөрүүлээх быһыыга-майгыга арыйда. Бочуоттаах ыалдьытынан РФ физическэй култуураҕа уонна маассабай успуорка департаменын дириэктэрэ Максим Сергеевич Уразов буолла. Кини РФ успуордун миниистирэ, Олимпийскай кэмитиэт бэрэсидьиэнин Михаил Владимирович Дегтярев аатыттан эҕэрдэтин уонна махтал тылларын анаата.
— Бүттүүн тыа сирэ сайдарын туһугар туһуламмыт ураты спортивнай тэрээһин. Саҥа эбийиэктэри кытары, олох хаачыстыбата эмиэ үрдүүр. Саха сирин успуордун министиэристибэтэ Арассыыйаҕа бастыҥнар истэригэр киирэр, чуолаан төрүт успуорт уонна олимпийскай көрүҥнэргэ.
Ил Дархан Айсен Николаев Таатта улууһа былыр-былыргыттан күүстээх бөҕөстөрдөөҕүнэн биллэрин этэн аһарда уонна саҥа успуорт дыбарыаһыттан күүстээх бөҕөстөр, мадьынылар үүнэн тахсан бүтүн өрөспүүбүлүкэни уонна дойдубутун ааттатыахтара диэн эрэнэрин биллэрдэ.
Таатта улууһун аҕа баһылыга Айаал Бурцев 2023 сыллаахха сэтинньигэ оруобуна бу күн икки сыбаайа түспүтүн уонна бииргэ олоххо киирбиттэрин үөрэн-көтөн туран иһитиннэрдэ.
— Кырдьык, бу өрөспүүбүлүкэҕэ саамай улахан спортивнай эбийиэк. Биир дойдулаахпыт «Монтажник» тэрилтэ, салайааччы Александр Александрович Ханин, олус кыһаллан бириэмэтигэр үлэҕэ киллэрдэ. Саҥа дыбарыаска элбэх кыайыылар, саҥа сулустар баар буолуохтара диэн эрэнэбит. Уонна бүгүн «Манчаары оонньууларын» бастакы кыһыл көмүс мэтээлин аан бастакынан Таатта улууһа саҥа дыбарыаска ылла!
Николай Цыпандин күрэс төрүт көрүҥнэригэр XXII «Манчаары оонньуулара» сүрүн судьуйата саҥа дыбарыас туһунан санаатын үллэһиннэ:
— Олох бары өттүнэн үчүгэй, киэҥ-куоҥ успуорт уораҕайыгар «Манчаары оонньууларын» бастакы күнүгэр хотугу дэгит күрэс, гиирэ анньыыта буолан бүттэ уонна билигин буулдьанан ытыыга салгыы күрэс бара турар. Улахан успуорт дыбарыаһыгар «Манчаары ооньууларын» курдук улахан күөн күрэс ыытыллара олус табыгастаах. Саҥа эбийиэк туох баар ирдэбилгэ барытыгар эппиэттиир, спортсменнарга усулуобуйа барыта баар.
Күрэстэһээччилэр саҥа успуорт дыбарыаһын сөҕө-махтайа көрдүлэр, сиһилии видеоҕа көрүҥ:
Суруйда Янис СЫСОЛЯТИН.
Кэрэспэдьиэн Стас ПОПОВ, монтаж Авдей НЕУСТРОЕВ, «Кэскил» оҕо пресс-киинин эдкордара.
keskil14.ru