Тохсунньу 29 күнүгэр Ытык-Күөлгэ Норуот айымньытын дьиэтигэр улуустааҕы төрөппүттэр түмсүүлэрин тэрийиитинэн «Родные-Любимые» форум ыытылынна. Бу форум биһиги улууспутугар иккис сылын «Бастыҥнар хамсааһыннарын» чэрчитинэн ыытыллар.
Биһиги үөрэхпит холбоһугуттан төрөппүт кэмитиэтин бэрэссэдээтэлэ Федорова А.А. уонна кэмитиэт чилиэттэрэ Васильева И.Г., Винокурова М.М., оҕолорунуун: Васильев Алешаны, 8 кылаас, Федорова Алгыстааны, 6 кылаас, Федоров Арчылааны, 1 кылаас, Винокурова Саргыны, 4 кылаас үөрэнээччилэриниин көхтөөхтүк кыттан кэллилэр. Тэрээһин 4 хайысхаҕа арахсан барда. Араас маастар-кылаастары, индивидуальнай турниры, консультациялары ыыттылар: 1. «Создавай и вдохновляй!» «Култуура, сатабыл» 2. «Найди призвание!» «Үлэ, идэ, бэйэ суолун булунуу»: «Истиҥ тылларбын чугас киһибэр аныыбын»-маастар кылаас; кулинарнай хайысхаҕа «Таатталыы саламаат» 3. «Будь здоров! Чөл олох: ситис уонна кыай» индивидуальный турнир «Таатталыы талах дуобат» күрэҕэ. 4. «Благо твори! Үтүөнү үксэт» — консультациялар.
Манна оҕолор уонна төрөппүттэр бэйэлэрэ оҥорбут оҥоһуктарын быыстапкалара сэлэлии тэлгэммит. Бу быыстапка форум кыттыылаахтарын болҕомтотун тарта. Тэрээһин маҥнайгы чааһыгар «Дьоллоох дьиэ кэргэн» диэн панно күрэҕэ ыытылынна. Манна кыттааччылар араас сатабылларын көрдөрөн, ис хоһоонун арыйан дьиэ кэргэннэрин туһунан билиһиннэрдилэр, кэпсээтилэр. Күрэх түмүгүнэн, Айаара Атосьевна кыыһынаан Алгыстааналыын «Символ семейного благополучия» диэн номинацияҕа тигистилэр. Онтон «Таатталыы талах дуобат» күрэҕин турнирыгар алын кылаастарга Саргы Винокурова 2 миэстэни ылан, барыбытын үөртэ.
Ол курдук, бүгүн сүрдээх үчүгэй тэрээһиҥҥэ кыттан, төрөппүттэр бэйэлэрин уопуттарын атастаһан, саҥаны билэн-көрөн кэллилэр. Бүгүн биир сүрдээх сөптөөх этиини истэн сэргээтим: «Аан бастаан төрөппүт инники сылдьыахтаах оҕо кинини батыһыахтаах диэн,»-ол аата сайдыылаах төрөппүт оҕото олоххо бэлэмнээх буолар диэн. Кырдьык даҕаны, төрөппүт, биир да күнү мээнэ ыыппакка, оҕото олоххо бэлэмнээх, сайдыылаах буоларын туһугар кыһаллыахтаах, араас сатабылларга уһуйуохтаах. Бу тэрээһиҥҥэ кыттыбыт төрөппүт кэмитиэтигэр улахан махталбын тиэрдэбин! Өрүү оҕолорбут сайдалларын туһугар бииргэ ылсан үлэлиэҕиҥ!
Варианна Макарова, Харбалаахтааҕы үөрэхтээһин холбоһугун дириэктэри иитэр үлэҕэ солбуйааччы.
keskil14.ru