Оҕо саас, оҕо саас
Олохпут эрэлэ оҕо саас
Норуоппут кэскилэ – оҕо саас
Дьоллоох биһик оҕо саас
Бүтүн аан дойдуга сыл ахсын оҕо көмүскэлин күнэ бэлиэтэнэр. Оҕо норуот инники кэскилэ уонна эрэлэ буолар. Эйэлээх уонна дьоллоох оҕо саас киһи аймах барыбыт кыһамньыта уонна мэктиэтэ.
Ол курдук, бүгүн 2023 сыл бэс ыйын 1 күнүгэр Ытык Күөлгэ Таатта киинигэр «Оҕо көмүскэлин» күнүн бэлиэтиир үөрүүлээх тэрээһин буолан ааста.
Тэрээһин оҕо уһуйаанын иитиллээччилэрин, оскуола алын кылаас үөрэнээччилэрин, оҕо хамсааһынын түмсүүтүн кыттыылаахтарын парадтарынан саҕаланна.
Оҕолор «Дьоллоох оҕо саас» кэнсиэргэ, «Бары бииргэ» флешмобка олус көхтөөхтүк кытыннылар. Тэрилтэлэр төрүттээбит эйгэлэригэр сөбүлээн, сэҥээрэн сырыттылар. Дьиэ кэргэттэр саамай кырачааннарга анаммыт «Киэргэммит оҕо кэлээскэтэ» күрэскэ кытыннылар.
Үөрүүлээх тэрээһин парадын, кэнсиэрин «Ситик» оҕо түмсүүтүн лидердара Ая Таппырова, Хаарчаана Заворотная, Саша Аввакумов, Афоня Канаев иилээн – саҕалаан ыыттылар. Ону таһынан «Ситиктэр» «Dance Mix» аныгылыы үҥкүү күрэһигэр көхтөөхтүк кыттан кыайыылааҕынан таҕыстылар.
Бүгүҥҥү күммүт былыта суох күѳх халлаан дьоллоох оҕо сааhы кэрэhэлиир күнэ буолла, баҕа санаабыт барыта туоллун, саныыр санаабыт ситтиһиллиннин, элбэххэ үөрэниэххэ, үгүһү билиэххэ, дьоллоох, эйэлээх олоххо олоруохха.
«Сатабыл» медиа студията
Тааттатааҕы «Сатабыл» оҕо айымньытын дьиэтэ