Быйыл куйаар ситимигэр тарҕаммыт рэп ыллаабыт кыра уолчааны көрбүккүт- истибиккит? Кини — Дьулус Колесов, 10 саастаах, Үөһээ Бүлүүтээҕи М. Т. Егоров аатынан 2-с нүөмэрдээх орто оскуола үөрэнээччитэ.Биһиги кинини Дүллүкүгэ эбэтин аахха күүлэйдии кэлэ сылдьыбытын көрсөн кэпсэттибит.
-Дьулус, ырыа кэрэ эйгэтигэр хаһан киирбиккиний?
-Кыра эрдэхпиттэн улууспар «Үрүйэчээн» ансаамбылга ыллыыбын. Сахая Валерьевна, Прасковья Васильевна, Туйаара Николаевна дьарыктаабыттара. Билигин ырыаны ийэм үөрэтэр.
-Көрөөччүлэргэ ырыаны хайдах таһаараҕын? Бэйэҥ айаҕын, үөрэтэҕин дуу?
-Интернеттэн истэн сөбүлээбит ырыабын үөрэтэбин. Ырыа тылын, дьүрүлүн сөбүлээтэхпинэ үөрэттэн толоробун. Ийэм онно көмөлөһөр. Джида, KitJah, Варя Ларионова, араас саха ырыаһыттарын ырыаларын сөбүлүүбүн.
-Сыанаҕа хас саастааххар тахсыбыккыный?
-Элбэх көрөөччүгэ 8 сааспар тахсыбытым. Үөһээ Бүлүүгэ KitJah концертыы кэлбитигэр сылдьыбытым. Онтон ыллаан барбытым.
-Куоракка ырыа бырааһынньыгар биллэр ырыаһыт Джидалыын ыллаабытыҥ. Бэлэмнэммиккит дуо?
-Джидалыын ыллыыр баҕа санаам этэ. Ыллыы турдахпына, эмискэ тахсан ыллаһан барбытыгар олус соһуйбутум, долгуйбутум. Эрдэ көрсөн бэлэмнэммэтэхпит.
-Эн сыанаҕа холкутук туттан ыллыырга үөрэммиккин. Саҥа ыллыыр, сыанаттан толлор оҕолорго тугу сүбэлиэххиний?
-Сыанаҕа бастаан тахсаргар син биир кыбыстаҕын, иккистээн тахсаргар син үөрэнэҕин, онтон үһүстээн ыллыыргар сыана хайдаҕын билэҕин, ол иһин кыбыстыбакка ыллыыгын. Итинник кэрдиистэринэн тахсаҕын.
-Ыллыыргар кими холобур оҥостоҕунуй?
-Ийэбин Марина Васильевна Колесованы холобур оҥостобун. Кини ис сүрэҕиттэн истиҥник ыллыыр. Ийэм «Эн эрэ» диэн ырыаны олус үчүгэйдик толорор.
-Ырыаттан атын туох дьарыктааххыный?
-Хапсаҕайга уонна көҥүл тустууга дойдубар Оҕо спордун оскуолатыгар 2-с кылаастан дьарыктанабын. Билигин 35 киилэ ыйааһыҥҥа тустабын.Тренердэрим — Владимир Валерьянович Литвинов, Михаил Михайлович Егоров. Улууспар уонна республиканскай күрэхтэһиилэргэ кыттааччыбын.
-Биллэр ырыаһыт, буолуоххун баҕараҕын дуо?
-Эстрадаҕа уонна тустууга биллэр киһи буолуохпун баҕарабын.
-Сайын туох дьарыктааххыный?
-Оскуолам «Чэбдик» лааҕырыгар сылдьыахтаахпын, тустуубар эрчиллэбин.
-Оҕолорго туох баҕа санааҕын тиэрдэҕин?
-Оҕолор сайыны көхтөөхтүк уонна көрдөөхтүк атааралларыгар баҕарабын. Улаатан, Саха сирин инники эрэллэрэ буоллуннар.
-Улахан киһилии сэргэх кэпсээниҥ иһин махтал!
Дьулус Колесовка ырыа алыптаах эйгэтигэр уонна спорт эриирдээх көрүҥэр ситиһиилэри баҕарабыт!
Айыына Петрова, VIII кылаас, «Эрчим» медиакиин, Дүллүкү, Үөһээ Бүлүү