Оҕолор манна аҥаардас үөрэҕи эрэ өрө туппакка, дэгиттэр буоларга уһуйуллаллар. Ол курдук, “Муусука—барыбытыгар” бырайыагы олоххо киллэрии чэрчитинэн муусука учуутала Протопопова Ирина Васильевна айымньылаахтык үлэлиир.
Капитонова Наталья Петровна , Билим уонна үөрэх М.Е. Николаев аатынан Өктөмнөөҕү Киинин бибилэтиэкэтин сэбиэдиссэйэ:
—Протопопова Ирина Васильевна , талааннаах педагог, уhуйааччы. Утумнаахтык үлэлээн ырыа, муусука эйгэтин Ɵктɵм лиссиэйигэр эрэ буолбакка, нэhилиэк ырыа куттаах дьонун түмэн ыллатара-тарҕатара — бу барыта дойдубут дьолугар, оскуолабыт сайдарыгар! Ирина Васильевнаҕа ааспыт 2022 сыл ситиhиилээх буолла. Кини өрөспүүбүлүкэҕэ муусука учууталларын кɵрүүгэ кыайыылааҕынан таҕыста. «Муусука—барыбытыгар» бырайыак элбэх тэрээhиннэрин кыайыылааҕар, Протопоповаҕа Ирина Васильевнаҕа итии-истиҥ эҕэрдэ! Кэскиллээх үлэҥ үчүгэй түмүктэрдээх буоларыттан үɵрэбит! Инникитин ɵссɵ да элбэх ситиhиилэр эн ураты дьоҕургунан, ыраас куоласкынан доҕуhуоллана туруохтара диэн эрэнэбит, алгыс тылбытын тириэрдэбит!
Репертуарбыт баай
Кира Ся — Билим уонна үөрэх М.Е. Николаев аатынан Өктөмнөөҕү Киинин IX кылааһын үөрэнээччитэ:
—Мин лиссиэй хоругар өр кэм дьарыктанным уонна араас таhымнаах кэнсиэртэргэ, академическай ырыа куонкурустарыгар кытынным. Ол курдук, биhиги репертуарбытыгар Е. Захарова «Көлүкэчээн», Н. Берестов «Өрөгөй ырыата” , В. Шаинскай «Мир похож на цветной луг», Б. Савельев «Мир Вам, люди!», Джулио Каччини «Аve Maria”, Джакомо Перголези «Stabat Mater”, о.д.а. айымньылар бааллар. Хорга дьарыктанан, сыанаҕа тахсан, көрөөччү иннигэр толоруу наһаа туһалаах буолла. Ол курдук, ити үөрүйэҕим араас таhымнаах олимпиадаларга, научнай кэмпириэнсийэлэргэ дакылаат ааҕарбар бэйэҕэ эрэли үөскэтэр, күүскэр күүс эбэр эбит. Уонна бэйэбитин биир хамаанда курдук сананарга, биир санаанан салайтаран үөрэнэргэ кынаттыыр. Барҕа махталбын этиэм этэ биһиги салайааччыбытыгар, муусука учууталыгар Протопопова Ирина Васильевнаҕа! Кини биһигини сөпкө тыынан ыллыырга уонна сырдык, үтүө, патриотическай санааҕа үөрэтэр-такайар. «Бэлэм буол» сурунаал ааҕааччыларыгар ситиһиини баҕарабын.
Классическай муусука ис кистэлэҥин, күүстээх дьайыытын өйдөөн, оҕо дэгиттэр сайдарыгар төһүү күүс буоларын өйдүүргүтүгэр баҕарабын.
Леонтьева Жанна бэлэмнээтэ.