Тохсунньу 30 күнүгэр Польша туриһа, велосипедынан сылдьар айанньыт Адам Борейко биһиги оскуолабытыгар ыалдьыттаан, оҕолору кытта көрсөн ааспыта. Онтон бүгүн кини олохтон соһуччу туораабытын курутуйа иһиттибит…
Уолбабыт аттынан элбэх турист ааһар этэ эрээри оскуолаҕа ханнык да турист ыалдьыттыы илигэ. Ол да иһин буолуо Адам Борейконы кытта көрсүһүү биһиэхэ умнуллубат түгэнинэн буолбута. Сонун киһи кэпсээнин сэргии истибиппит. Кини дойду саамай итии, үрдүк уонна тыйыс тымныы точкаларыгар велосипедынан айаннаан тиийэр ыра санаатын толорор сыалтан, Өймөкөөҥҥө тымныы полюһугар баран иһэрин туһунан кэпсээбитэ. Күҥҥэ 70-75 км айанныыр сыаллааҕын, бу күн Мэҥэ Алдаҥҥа тиийиэхтээҕин туһунан эппитэ.
Чаас устата буолбута көрсүһүүгэ Адам Борейко интэриэһиргиир ыйытыыларбытыгар барытыгар хоруйдаабыта. Бириэмэни билбэккэ да хаалбыппыт. «Соҕотоҕун сылдьарыҥ кутталлаах дуо?» – диэн ыйытыыбытыгар соҕотох сылдьарын сөбүлүүрүн туһунан эппитэ. Кими да күүппэккэ, бэйэтэ турда, барда – киниэхэ табыгастаах.
Адам 52 саастаах, түөрт улахан оҕолоох, сиэннээх. Дьиэ кэргэнинэн сөбүлээн эмиэ велосипедынан айанныыллар эбит. Олус элбэх сиргэ сылдьыбыт – Марокко, Сахара, Европа. Саҥа дьылы дойдутугар Варшаваҕа көрсүбүт. Ол иннинэ биир ый Индияҕа, Гималай хайатыгар сылдьыбыт. Нууччалыы үчүгэйдик саҥарара. Оҕолорго «үөрэххитигэр кыһаллыҥ, омук тылын үөрэтиҥ» диэн сүбэлээбитэ.
Туйаара Кусатова, Диана Данилова бэлэмнээн аҕалбыт кэһиилэрин уонна мин Уолба туһунан бэйэм оҥорбут магнит-кинигэбин бэлэхтээбиппит, автограф ылбыппыт, хаартыскаҕа түспүппүт. Ситиһиилээх айаны баҕара хаалбыппыт.
Ыра санаа угуйар күүһүнэн кынаттанан модун санаалаах айанньыты Адам Борейконы умнуохпут суоҕа.
Маайа БОППОСОВА, VII кылаас,
В.И. Ленин аатынан Уолба орто оскуолата, Таатта