Олохпут сайдыытын тэтимэ түргэн буолан, билигин дьон-сэргэ сонуну Интэриниэттэн билэр. Бүгүҥҥү күҥҥэ ким баҕарар бэйэтэ тугу көрбүтүн-истибитин атын дьоҥҥо араас социальнай ситимнэргэ арыйбыт аккаунун нөҥүө тиэрдэр кыахтаах. Өскөтүн төлөпүөнүҥ хаачыстыбалаах камералаах буоллаҕына, видеоҕа устан, хаартыскаҕа түһэрэн, блогер оруолугар холонон көрүөххүн сөп.
Чурапчы С.К. Макаров аатынан гимназиятын VII “Б” кылааһын үөрэнээччилэрэ аан дойду барыта көрөр YouTube видеохостинговай сайтка видео таһаараллар. Оҕолор бу ситими туһанан, киэҥник биллиэхтэрин баҕараллар.
“Идиэйэм баһаам”
Настя Дьяконова ютубка бэйэтин аатынан, араспаанньатынан “Настя Дьяконова” диэн ханааллаах. Бу манна кыргыттарга араас тиэмэҕэ сүбэлэри, лайфхактары, эксперименнэри уһулан угар.
Киһи сэҥээрэр гына устар буолан, 9 тыһыынчаттан тахса киһи көрбүт. Сурутааччытын ахсаана — 282. Улуус таһымыгар бу элбэх.
– Мин олохпор YouTube улахан оруолу оонньоото. Бэйэм кылгас көрдөөх видео устарбын уруккуттан сөбүлүүбүн. 11 сааспыттан Катя Клэп, Мария Вей блогердары көрөбүн. Бу кыргыттар 6 мөлүйүөн сурутааччылаахтар. Мин эмиэ маннык элбэх сурутааччылаах буолуохпун баҕарабын. Барытын бэйэм устабын: таҥабын, артыыстыыбын, сүрүн кэрчиктэрин толкуйдуубун. Төһө кыалларынан элбэх видеоны таһаарыам, миэхэ идиэйэ баһаам.
«Толкуйдаабыккытын устан иһиҥ!»
Аина Давыдова VII “Б” кылаас үөрэнээччитэ 2018 сылга “Aina Y” ханаалы арыйбыта. Бастаан төлөпүөнүгэр баар видеолары угар эбит. Оттон кылгас вайннары устар буолбут. Саҥа саҕалыырыгар дьоҥҥо-сэргэҕэ биллэр буолуом, элбэх сурутааччыланыам дии санаабатах.
– Билигин 160 сурутааччылаахпын. Биир сыл иһигэр бэйэм таһыммар бу элбэх дии саныыбын. Мин Катя Адушкина ханаалын сэргээбитим аҕай. Ол иһин ону көрөн, дьүөгэбин кытта видео устарга санаммыппыт. Кылгас күлүүлээх видеоларбыт нэһилиэк оҕолоругар түргэнник биллибиттэрэ. Быйыл үксэ оскуола олоҕуттан “влог” (ол эбэтэр видеоблог) оҥорон киллэрэбин. Онно үөрэнээччилэри кытта кэпсэтэбин, араас тэрээһиннэри устабын.
Туохтан да толлубакка, кыбыстыбакка, тугу толкуйдаабыккытын барытын устан иһиҥ! Бастаан табыллыбатаҕына, санааҕытын түһэримэҥ, иннигит диэки хардыылыырга дьулуһуҥ!
Аэлита Аргунова,
VII “Б” кылаас.
Чурапчы.