Балаҕан ыйын 3 күнүгэр Аан дойду иккис сэриитэ бүппүт күнэ билиэтэнэр. Бу сылга сэрии бүппүтэ 80 сыла буолар. Ону кытта ситимнээн Саха Өрөспүүбүлүкэтин Национальнай бибилэтиэкэтэ «День окончания Второй Мировой Войны. Разгром японских войск на Дальнем Востоке» диэн виртуальнай быыстапка бэлэмнээтэ. Быыстапканы култуура уонна үөрэҕирии бырайыактарын уонна бырагыраамаларын отделын кылаабынай бибилэтиэкэрэ Туяра Васильевна Сокорутова оҥордо.
Быыстапка биһиэхэ Аан дойду иккис сэриитэ бүтэһик ыйдарын туһунан кэпсиир:
1943 сыллаахха Тегеранскай конференция түмүгүнэн Сэбиэскэй Сойуус Фашистскай Германияны кыайан баран милитаристскай Японияны утары сэриигэ көмөлөһөргө эбээһээтилистибэ биэрбитэ. Атырдьах ыйын 8 күнүгэр эппит тылын толорон Японияҕа сэриинэн киирэр.
Уоттаах Аҕа дойду Улуу сэриитин кыайбыт буойуттар 23 күн иһигэр Квантунскай армияны суох оҥорбуттара. Хотугу-илин Кытайы, хотугу Кэриэйэни, Курил арыыларын, соҕурууҥҥу Сахалины босхолообуттара. Японияны утары сэриигэр Саха сириттэн 3685 буойун кыттыбыта, олортон 2727 киһи дьиэтигэр төннүбүтэ.
Балаҕан ыйын 2-с күнүгэр Япония капитуляция баттаан, Иккис Аан дойду сэриитэ түмүктэммитэ.
Онтон атын виртуальнай быыстапка сирэйигэр «Про окончание Второй мировой войны» видеоролик көрүөххэ сөп. Ролик текстын Семен Семенович Павлов, Бүлүү краеведческай музейын үлэһитэ, ааҕар.
«День окончания Второй Мировой Войны. Разгром японских войск на Дальнем Востоке» быыстапка биһиэхэ Аан дойду иккис сэрии бүтэһик, тутаах кэрчигин туһунан сырдатар, сэриигэ кыттыбыт хорсун буойуттар сырдык ааттарын үйэтитэр.
Быыстапканы бу сигэнэн киирэн көрүөххэ сөп: https://old.nlrs.ru/exhibitions/den-pobedy-nad-militaristskoy-yaponiyey/
keskil14.ru