Ыам ыйын 18 күнүгэр Саха сиригэр 2004 сыллаахтан Ньургуһун күнэ бэлиэтэнэр.
Семен Данилов
Бастакы ньургуһун
Үчүгэй да буолар ньургуйан
Күн өҥнөөх бастакы ньургуһун.
Ып-ыраас амарах хараҕынан
Эрэнэ көрүнэр тулатын.
Тугу да, тугу да билиммэт
Дьолтон, күн санааттан ураты.
Ол иһин тымныыттан сэрэммэт,
Ньургуннук тобулар тоҥ буору.
Бастакы барыта ураты
Үөрүүнү, иэйиини үөскэтэр:
Бастакы күөрэгэй ырыата,
Кэҕэ кыыл чоргуйар саҥата.
Аан бастаан эн көрбүт ыһыаҕыҥ
Симэммит чэчирин кэрэтэ
Аан бастаан оһуохай ырыатын
Биир кыыстыын хатылаан дьиэрэтэр.
Оо, ханнык күн иэйии солбуйуой
Бастакы тапталбыт сулуһун!
… Үчүгэй да буолар ньургуйан
Күн өҥнөөх бастакы ньургуһун.
keskil14.ru