Сэргэлээх сэргэх олоҕо. Элбэх билиилээх-көрүүлээх, көхтөөх, кэскиллээх ыччат түмсүбүт сирэ. Бары — дьоҕурдаахтар, уратылаахтар. Бачча үгүс устудьуонтан биир нарын-намчы, чаҕылхай, үлэһит кыыһы бэлиэтиэхпин баҕарабын. Кини — Юлия Попова, М.К. Аммосов аатынан ХИФУ ХИНТуоКИ саха-английскай салаатын II кууруһун устудьуона.
Мин от ыйын 22 күнүгэр 2003 сыллаахха Александр Петрович, Елена Егоровна Поповтар дьиэ кэргэттэригэр үһүс оҕонон төрөөбүтүм. Чурапчы улууһун Төлөҥ — Дириҥ нэһилиэгиттэн төрүттээхпин. Бииргэ төрөөбүттэр — 4 кыыспыт.
Актыбыыс диэн кимий?
— Актыбыыс туохтан да толлубат, уопсай үлэттэн туора турбат, дьоҥҥо үөрүүтүн, сырдык санаатын үллэстэр киһи.
Кыра сааспыттан барытыгар көхтөөхпүн. Оскуола лиидэрэ этим. Араас тэрээһиннэргэ, олимпиадаларга кыттааччыбын. ХИФУ-га бастаан кэлэн баран актыбыыстары көрөн олус сөхпүтүм уонна кинилэр курдук устудьуон кэммин уопсастыбыннай үлэҕэ аныам, дьарыктаныам диэн быһаарыммытым. Ол курдук, билигин университет устудьуоннарын идэлээх сойуустарыгар, нууччалыы кылгатан эттэххэ, “ППОС-ка” ситиһиилээхтик үлэлии сылдьабын. Актыбыыстары өйүүллэр, утумнаахтык, дьаныардаахтык үлэлээтэххинэ, үрдүк стипендия ылаҕын.
ИМКО — устудьуон олоҕум күндү бэлэҕэ
— ИМКО (Комиссия по имиджевой и корпоративной политике) «ППОС» үлэтин салаата, хайысхата буолар. Бу хамыһыыйа үс төгүллээх “Лучшее структурное подразделение”! Бүтүн республикаҕа биллэр ыччат тэрилтэтэ. Салайааччыларбыт Алеша Семенов уонна Күннэй Егорова барыбытын өйүүллэр, көҕүлүүллэр. Тапталлаах хамыһыыйам сылтан сыл аайы сайдан, үрдүктэн үрдүккэ тахсан иһэригэр баҕарабын. “ИМКО” диэн биир тылга олус элбэх суолта сытар. Устудьуон олоҕум саамай күндү бэлэҕэ буолар.
Дьааҥы оҕолоругар баһаатайынан үлэлиигин?
— Билигин ууга барбыт Дьааҥы оҕолоругар өрөспүүбүлүкэтээҕи коррекционнай оскуола-интэринээт иһинэн көмө лааҕырга баһаатайынан улэлии сылдьабын. Оҕолор олус көрсүөлэр, кыралыын-улаханныын кэпсэтинньэҥ, киирбит-тахсыбыт оҕолор. Баһаатай быһыытынан үлэлиирим маҥнайгы холонуум буолар, олус диэн сөбүлээтим уонна астынным. Бэйэм учуутал идэтигэр үөрэнэр буоламмын, бу үлэ, алтыһыы улахан уопут буолар.
5 ыйытык
— Сөбүлээн сиир аһыҥ?
— Бэрэски
— Таптыыр доҕордооххун дуо?
— Баар…Аатын эппэппин(күлэр)
— Сүрэххин уйадыппыт киинэ?
— “Полночное солнце»
— Баҕа санааҥ?
— Чугас дьонум куруук аттыбар баар буоллуннар
— Бэйэҕин хайдах киһинэн сыаналыыгын?
— Үтүө санаалаах, сырдык сыдьаайдаах.
Юлияҕа үрдүк ситиһиилэри, үөрэҕэр, айар дьарыгыгар уҕараабат күүһү, иэйиини, үтүө түгэннэри баҕарабыт!
Эльдар Садовников.