Бүгүн, бэс ыйын 27 күнүгэр, Дьокуускай куорат өрүһүн пордугар XXII-с төрүт көрүҥнэр Спартакиадата «Манчаары оонньууларын» уота умайда. Уот Мэҥэ Хаҥалас улууһуттан айаннаан кэллэ, салгыы Дьокуускай-Чурапчы-Таатта хайысханан барыаҕа уонна от ыйын 8 күнүгэр Ытык Күөлгэ «Дьулуруйар Ньургун Боотур» стадиоҥҥа миэстэтин булуоҕа.
Үөрүүлээх түгэҥҥэ Дьокуускай куорат ил дарханын солбуйааччыта Владимир Владимирович Аржаков уонна Дьокуускай куорат олохтоох дьаһалтатын физическэй култуураҕа уонна спортка Управлениятын начаалынньыга Эдуард Васильевич Ефимов кыттыыны ыллылар.
Күндү сахам дьонун буолаары турар ыһыахтарынан, Туймаада ыһыаҕынан итиитик-истиҥник эҕэрдэлиибин! Чуолаан маннык сүдү сыаллаах-соруктаах кэлбит бэтэрээн спортсменнарбытын уонна үүнэр көлүөнэни, ыччаттарбытын, инники кэскилбитин ис сүрэхпиттэн эҕэрдэлээтэҕим буолуохтун! Бүгүн бу үөрүүлээх быһыыга-майгыга эстафетабыт уотун туттубут, аны салгыы сарсын Туймаада Ыһыаҕар уота күөдьүйүө. Эбии этэр эбит буоллахха, бу биир киэн туттар Оонньууларбыт, сахалар Олимпиадабыт уота мин төрөөбүт дойдубар, Тааттаҕа, тиийэриттэн тус бэйэм олус үөрэн уонна долгуйан турабын.
-, диэн Владимир Владимирович үллэстэр.
Буолаары турар Оонньуулар уотун көрсүү сиэригэр-туомугар эстафетаҕа кыттыыны ыллылар:
- Дмитрий Николаевич Горохов, экстремал сүүрүктэр салайааччылара, СӨ ФК уонна Спорт үтүөлээх үлэһитэ, 2004, 2008, 2012, 2016 сыллардаах «Азия оҕолорун» оонньуутун, 2006, 2010, 2014, 2019 сыллардаах Саха сирин норуоттарын спортивнай оонньууларын уонна 2005, 2013, 2017, 2021 сыллардаах «Манчаары оонньууларын» уотун эстафетатын салайааччыта;
- Екатерина Константиновна Драгунова, СӨ спордун маастара;
- Владимир Иванович Тордуянов, СӨ ФК уонна Спорт туйгуна, IV «Азия оҕолорун» оонньуутун уотун эстафетатын кыттыылааҕа;
- Владимир Владимирович Находкин, СӨ сүүрүүгэ марафонун спордун маастара, «Азия оҕолоро», Манчаары оонньуулара», Саха сирин норуоттарын спортивнай оонньууларын хас да төгүллээх кыттыылааҕа;
- Александра Егоровна Мохначевская, Москва, Дьокуускай, Казань куораттааҕы марафоннар финишерэ;
- Мария Ильинична Дьяконова, өрөспүүбүлүкэтээҕи хайыһар, чэпчэки атлетика уонна туризм көрүҥнэрин чемпиона уонна призера;
- Валентина Гаврильевна Доргуева, СӨ үлэ уонна спорт бэтэрээнэ, марафоҥҥа Европа, Арассыыйа уонна Саха сирин хас да төгүллээх чөмпүйүөнэ, 2022 с. Дьокуускай куорат сыл бастыҥ спортсмена.
Өрөгөйдөөх уоту эстафета салайааччыта Дмитрий Николаевич Горохов Дьокуускай куорат ил дарханын солбуйааччытыгар Владимир Владимирович Аржаковка үөрүүлээх быһыыга-майгыга туттарда. XXII-с «Манчаары оонньууларын» уота Дьокуускай куоракка кэллэ.
«Манчаары оонньууларыгар» аны 10 күнүнэн көрсүөхпүт!
Сиһилии видео-матырыйаалга көрүҥ:
keskil14.ru