Уус Алдан улууһун Кэптэни нэһилиэгэр тохсунньу 30 — олунньу 1 күннэригэр сылын аайы ыытыллар «Лөгөй мадьынылара» өрөспүүбүлүкэтээҕи күрэхтэһии буолан ааста. Быйылгы түһүлгэ 456 мадьыныны түмэ тарта. Чурапы улууһун чиэһин Хадаар оскуолатын үөрэнээччитэ Вова Герасимов көмүскээтэ. 60 кг ыйааһыҥҥа бочуоттаах үһүс миэстэни ылан дойдутугар айхаллаан кэллэ.
Күрэх бастакы күнэ: Ыйааһын уонна бэлэмнэнии
Тохсунньу 30 күнүгэр, күрэх бастакы күнүгэр, араас улуустартан кэлбит кыттааччылар ыйааһыннаннылар уонна сарсыҥҥы күрэхтиһиигэ бэлэмнэннилэр. Хадаар оскуолатыттан соҕотох улуус чиэһин көмүскээбит Вова Герасимов 60 киилэҕэ ыйааһынын ааһан, сүпсүлгэннээх күҥҥэ бэлэмнэммитэ. Бу ыйааһыҥҥа 24 кыттааччы, оттон күрэххэ уопсайа 456 мадьыны киирсибитэ.
Күөн көрсүһүүлэр: хотторуу кэнниттэн кыайыы күүһэ
Тохсунньу 31 күнэ. Күрэхтэһии иккис күнэ. Бытааннык саҕаламмыт киирсиилэр икки эргиирдээх буоллулар. Вова бастакы эргииргэ кыайыыны ситиспитэ, ол эрээри иккис эргииргэ куорат ДЮСШ-1 иитиллээччитигэр иннин биэрэн, бастакы хотторуутун ылла. Ол да буоллар Вова санаатын түһэрбэт.
Олунньу 1 күнэ. Вова үһүс, төрдүс, бэһис, алтыс уонна сэттис эргиири ситиһиилээхтик түмүктээн, кыайыы кынаттаммыта. Ахсыс эргииригэр Чурапчытааҕы физкультура уонна спорт институтун устудьуона кинитээҕэр ордук бэлэмнээх буолан кыайыы өрөгөйүн билбитэ.
Итинник үс күннээх кытаанах киирсиилэри ааһан, Вова Герасимов бочуоттаах үһүс миэстэҕэ тиксибитэ.
Тренерга махтал!
Вова дьарыктыыр тренеригэр Леонид Николаевич Николаевка махталын тириэрдэр. «Бу күрэхтэн элбэх уопут ылан, астынан, дуоһуйан кэлбитим. Күрэх кэнниттэн маннык түмүккэ кэлбитим – ким бэлэмнээх, ким дьарыктаах ол элбэҕи ситиһэр» , – диэн кини санаатын үллэстэр.
Инникитин өссө күүскэ дьарыктанан, бэлэмнэнэн, кыайыы өрөгөйүн билэр туһугар үлэлиэҕин биллэрэр. Кини бары дьону бииргэ успуорту өрө тутарга, дьарыктанарга, чэгиэн буоларга ыҥырар. Вова Герасимовы эҕэрдэлиибит! Кэлэр күрэхтэһиилэргэ өссө улахан ситиһиилэри баҕарабыт!
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы