«Володя Ульянов дневнигэ» Бочуот дуоскатын «Бэлэм буол» («Кэскил») хаһыакка 50-тан тахса сыл редакторынан үлэлээбит Нина Иннокентьевна Протопопова толкуйдаан оҥорбут. Кини В.И.Ленин төрөөбүтэ 100 сылын көрсө оҕолору көҕүлүүргэ хаһыакка бу балаһаны киллэриэххэ диэн этии киллэрбит. Ону норуот суруйааччыта Н.Е.Мординов-Амма Аччыгыйа «Союз үрдүнэн ким даҕаны төбөтүгэр кэлбэтэх суол» диэн хойукка диэри хайгыыр эбит.
Бу дневниккэ киирбит оҕолор дастабырыанньа тутан, сорохтор «Артек» лааҕырга баран сынньанан кэлэн, олохторун биир саамай умнуллубат түгэнэ буолара.
«Бэлэм буол» 1990 с. кулун тутар 13 күнүнээҕи нүөмэригэр «Володя Ульянов дневнигэр» Үөһээ Бүлүү улууһун Хоро орто оскуолатын 5 кылааһын туйгун үөрэнээччитэ Даша Васильева тахсыбыт.
Биһиги Дария Саввичнаны булан ылан кэпсэттибит:
-Дария Саввична, хаартыскаҥ хаһыакка тахсыбытыгар хайдах ылыммыккыный?
-Наһаа үөрбүтүм уонна долгуйбутум. Кырыйан ылан өйдөбүнньүк гынан хаалларбытым. Ол саҕана хаһыаты бырахпакка, нүөмэрдэринэн туспа тиһэн иһэр этибит.
-Оскуолаҕа ханнык предмети ордук сөбүлүүр этигиний?
-Математикаҕа, физикаҕа сөбүлээн дьарыктанар этим. Точнай предметтэри ордорорум.
-Оскуоланы туйгуннук үөрэнэн бүтэрбитиҥ дуо?
-М.А.Алексеев аатынан Үөһээ Бүлүүтээҕи республиканскай гимназияны «4», «5» сыанаҕа үөрэнэн бүтэрбитим.
-Үчүгэйдик үөрэнэргэ, ситиһиилээх буоларга ‘йигин туох ордук көҕүлүүрэй?
-Үөрэҕи бэйэм дэбигис ылынар этим. Элбэҕи билэ -көрө сатыыр баҕа баара.
-«Володя Ульянов дневнигэр» тахсыбытыҥ инники олоххор сыалгын ситиһэргэр көмөлөспүтэ дуо?
-Эппиэтинэстээх, дьулуурдаах буоларга көмөлөстөҕө.
-Ханнык идэҕэ, ханна үөрэммиккиний, билигин тугу үлэлиигиний?
-2001 с. СГУ-га саха салаатын үөрэнэн бүтэрбитим. Онтон 2008 сылга Тыа хаһаайыстыбатын академиятыгар үөрэнэн экономист идэтин ылбытым. Билигин Дьокуускайга фитнес-тренеринэн үлэлиибин.
-Үөрэнээччилэргэ, баһаалыста, баҕа санааҕын, сүбэҕин тириэрдэҕин?
-Күндү оҕолор, билиигэ-көрүүгэ тардыһыылаах буолуҥ, кинигэни элбэхтик ааҕыҥ. Төрөөбүт тылгытын уонна атын омук тылын хайаан да үөрэтиҥ. Ситиһиилээх буолуҥ!
-Кэпсэппитиҥ иһин махтал.
«Володя Ульянов дневнигэ» үөрэнээччилэри үөрэҕи баһылыырга, олоххо дьулуурдаах, ситиһиилээх киһи буоларга сирдээбит, көҕүлээбит оҕо хаһыатын биир бастыҥ бэлэҕэ буолар дии санаатым.
Айыына Петрова, IX кылаас, «Эрчим» медиакиин, Үөһээ Бүлүү, Дүллүкү орто оскуолата.