Оскуола оҕолорун бэйэни салайыныы түмсүүлэрэ сылын аайы күүскэ үлэлииллэр. Манна көхтөөх, кыахтаах, баҕалаах үөрэнээччилэр киирэннэр, бэйэлэрин оскуолаларын уонна оҕолорун үөрэнэр усулуобуйалара уонна бүтүн оскуола олоҕо тупсарын туһугар бэйэлэрин санааларын ууран туран кыттыһаллар.
Биһиги Ньурба оройуонун Н.И. Кочнев аатынан I Хаҥалас орто оскуолабыт президенин талар быыбарбыт үрдүк таһымнаахтык ааста. Быйылгы үөрэх дьылыгар президент дуоһунаһыгар 4 кандидат турбута: 8 кылаас үөрэнээччитэ Володя Герасимов, 9 кылаастан Нелли Антонова, 10 кылаастан Таня Иванова, 11 кылаастан Краснослав Васильев.
Кандидаттар инники үлэлэригэр бырагыраамаларын кэпсээн, биир күн улахан ырытыһыы — дебат ыытыллыбыта. Быыбар иннинэ күн агитация ыытыллыбакка – «чуумпу күн» ааста. Онтон субуотаҕа, алтынньы 21 күнүгэр, оскуолабыт үөрэнээччилэрэ сүрдээх эппиэтинэстээхтик сыһыаннаһан 100% куоластаатылар. Учууталлар, үлэһиттэр эмиэ оскуола туһа диэн көхтөөх кыттыыны ыллылар.
Галина Никитична Антонова салайыытынан быыбар хамыыһыйатыгар Олег Адамов, Анжелина Жданова үлэлээтибит. Кини уопуттаах быыбар хамыһыйатын үлэһитэ буолан барытын ымпыгар-чымпыгар тиийэ тутуһан ыраас быыбары ыыттыбыт.
Быыбар түмүгэр элбэх оҕо итэҕэлин ылан Володя Герасимов эрэллээхтик оскуола президенин дуоһунаһын сүгэр чиэскэ тигистэ. Кини 8 кылаас үчүгэй үөрэннээччитэ. Куонкурустар, олипиадалар, ааҕыылар кыттыылааҕа. Спордунан утумнаахтык дьарыктанар. Дьиэ кэргэнинэн тыа хаһаайыстыбатын өрө туталлар, кэтэх фермалаахтар, онон Володя үлэһит уол. Киниэхэ оскуола президенин үрдүк аатын ылар кыах бэриллэн саҥа сонун сүүрээни киллэрэригэр уонна ситиһиини баҕарабыт!
Олег АДАМОВ, 11 кылаас, «ЫЛЛЫК» эдкорпост, Ньурба Хаҥалаһа.