Ороһу орто оскуолатыгар үөрэнээччилэри волейболга үөрэтии, эрчийии, уһуйуу түмүктээх буолла. Улуус үөрэнээччилэрин биир кэлим спартакиадатыгар иккис бөлөххө уолаттар үһүс буоллулар диэн сайтка иһитиннэрэн турабыт. Ааспыт нэдиэлэ бүтэһигэр кыргыттарга ыытыллыбыт волейбол күрэҕэр кыргыттарбыт иккис бочуоттаах миэстэни ылан, үөрэн-көтөн кэллилэр. Бастакы миэстэ Боотулу оскуолата, үһүс Дүллүкү оскуолата буоллулар.
Оскуола волейбольнай хамаандатыгар бары тохсус кылаас кыргыттара киирэллэр. Бастакы кылаастан тохсус кылааска дылы физкультураҕа Нина Григорьевна Ласточкина үөрэтэр. Кини үөрэппитэ, волейболга ситиһии кэлбитигэр улахан оруоллааҕын этэр тоҕоостоох. Кини балтын, Алина Ласточкинаны, волейбол секциятыгар сүбэлээн, 5 кылаастан соҕотоҕун тохсус кылаас кыргыттарын кытта оскуола чиэһин көмүскээн кэлбитэ хайҕаллаах. Алина инникитин күүстээх волейболистка буолуоҕа диэн эрэлбит улахан.
Волейболга уруок таһынан Алексей Петрович Данилов, Дмитрий Иванович Константинов дьарыктаан, уопсай түмүккэ волейболга иккис бөлөххө бастакы миэстэҕэ тахсыбыттарын ахтан ааһар наадалаах.
Кэлэр спорт көрүҥнэрин күрэҕэр эмиэ ситиһиилээхтик кытталларыгар баҕарабыт.
«Тымтык» эдкорпост, Ороһу.