Россиятааҕы үөрэнээччилэр бүттүүн хамсааһыннара дойдубут бары муннуктарын үөрэнээччилэрин түмэр, сомоҕолуур, биир хайысхалаахтык, биир сыаллаахтык үлэлиири, үөрэнэри көҕүлүүр. РДШ оҕолору бары өттүнэн сайыннарар сыаллаах, киэҥ хабааннаах, үрдүк таһымнаах тэрээһиннэри ыытар. Онуоха Мииринэй улууһун оҕо тэрилтэтэ бары тэрээһиннэргэ тэтимнээхтик кыттар.
Владислав Бурнашев Мииринэйдээҕи политехническай лиссиэйин IX кылааһын үөрэнээччитэ. Россия үөрэнээччилэрин бүттүүн хамсааһынын Мииринэй улууһун түмсүүтүн бэрэсэдээтэлин солбуйааччыта.
– Биһиги Россия үөрэнээччилэрин бүттүүн хамсааһынын Саха сиринээҕи региональнай отделениетын олохтоох салаатын биирдэстэринэн буолабыт. Биһиги түмсүүбүт түөрт хайысханан үлэлиир: информационнай-медийнэй, байыаннай-патриотическай, личностнай сайдыы, гражданскай көхтөөх буолуу. Хас хайысха аайы үөрэнээччилэри түмүү, доҕордоһууну, сомоҕолоһууну көҕүлээһин уонна кинилэр баҕа санааларын, идеяларын олоххо киирэрин өйүүбүт.
Оскуола уонна эбии үөрэхтээһин киинин төрүтүгэр медиа бөлөх, добровольческай этэрээттэр, байыаннай-патриотическай кулууптар, айар түмсүүлэр тэриллэллэр. Оҕолор сөбүлүүр эйгэлэригэр сайдалларыгар биһиги күүс-көмө буолабыт.
– Сайын түмүктэнэрэ чугаһаата. Россия үөрэнээччилэрин бүттүүн хамсааһынын сайыҥҥы быраграммата хайдах ааһан эрэр?
– Быйыл сайыҥҥы сынньалаҥҥа Мииринэй улууһугар оҕолорго анаан араас онлайн-куонкурустары, викториналары, аахсыйалары уонна дистанционнай ньыманан «Классные встречи» ыыттыбыт. Холобур, биһиэхэ Калифорнияттан, InDriver такси-сервис төрүттээччитэ, Арсен Томскай ыалдьыттаата. Сайыммыт биир умнуллубат түгэнэ, «Под парусом РДШ» онлайн лааҕыр тэриллиитэ буолар. Онно өрөспүүбүлүкэ бары улуустарын оҕолоро кыттыбыта. Лааҕыр чэрчитинэн, хайысхалар экспертэрин кытта профориентационнай кылаастары ыыппыппыт. Юриспруденция – өрөспүүбүлүкэ Конституционнай суутун бэрэсэдээтэлэ Александр Ким-Кимэн, предпринимательство – ООО «ЛенТранс» генеральнай дириэктэрэ Максим Дьячковскай уо.д.а. Кинилэр бары бэйэлэрин уопуттарын үллэһиннилэр уонна оҕолорго идэни билигин талалларыгар сүбэлээтилэр.
– Эн санааҕар, оҕо тэрилтэтэ сайдыытын ситиһэргэ туох нааданый?
– Барыта оскуолаттан саҕаланыахтаах, тэрилтэ дьаһалтата ханнык да оҕо тэрилтэтигэр көмөлөһүөн баҕарбат буоллаҕына, хамаанда чилиэннэригэр олус уустук буолуо дии саныыбын. Биһиги Саха сирин РДШ актыбыыстара, бырайыактыыр уонна процесс управлениятын департаменын, Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыытылыстыбатын дьаһалтатын кытта бииргэ төрөөбүт оскуолабытын сайыннарыы идеяларын уонна көҕүлээһиннэрин көмөлөһөр бырайыагы бэлэмниибит.
– Ситиһиигит хайдаҕый?
– РДШ Мирнэйдээҕи салаатыгар, 2019 сыл бүтүүтэ уонна 2020 сыл саҥатыгар биһиги төрөөбүт оройуоммут сайдарыгар бэлэмнээх түмсүүбүт үөскээбитэ. Элбэх аахсыйалары, флешмобтары, көрсүһүүлэри, куонкурустары ыытабыт. Бэйэбит дьыалабытын добровольнай төрүккэ олоҕуран ыытабыт. Хас биирдии тэрээһиҥҥэ киэһэ 20 ч. диэри кичэйэн бэлэмнэнэбит диэн этиэхпин баҕарабын. Биһиги ситиһиибит диэн бэйэбит түмсүүбүт, оройуоммутун, өрөспүүбүлүкэни уонна Россияны сайыннарарга бэлэмнээх, саамай талааннаах оҕолоро буолабыт.
– Бу кэпсэтии иһин улахан махтал! Ааҕааччыларбытыгар тугу этиэҥ этэй?
– Биһиги өрөспүүбүлүкэбит салайааччыларыгар этиэхпин баҕарабын. Саха сирин оҕолоро, бу инникитин төрөөбүт дойдуларын салайан, сайыннаран, бары хайысхаларга бастакы миэстэҕэ турарга дьулуһаллар. Бука бары үөрэнээччилэргэ оскуолаҕыт ыытар бары тэрээһиннэригэр көхтөөхтүк кыттыҥ, улуускут, өрөспүүбүлүкэбит туһугар айымньылаахтык үөрэниҥ, үлэлээҥ диэн ыҥырабын!
Павел Ильин.