Бэҕэһээ, ахсынньы 1 күнүгэр, «Быһа холбонууга» дойду бэрэсидьиэнэ Владимир Путинтан ынаҕы көрдөөбүт Чурапчы улууһун Арыылаах нэһилиэгин 8 кылааһын үөрэнээччитэ Алеша Сокольниковка көрдөспүт ынаҕа тиийдэ. Ынаҕы «Мындаҕай» ТХПК тиэйэн аҕалла. Уолбут ынаҕын Кэскилээнэ диэн ааттаата.
Алеша эдьиийэ Лена Валерьевна сүөһүнү Мындаҕаайыттан тиэйэн аҕалбыт суоппардарга Федор Макаровка уонна Сандал Антипиҥҥа, маны таһынан оройуон тыа хаһаайыстыбатын салалтатын салайааччытыгар Александр Сивцевкэ, солбуйааччытыгар Владислав Монастыревка, «Мындаҕай» ТХПК бэрэссэдээтэлигэр Александр Мохначевскайга махталын тиэрдэр. «Төһө да тымныылар турдулар, ынахпытын 139 км ыраах сытар Мындаҕаайыттан тиэйэн этэҥҥэ кэллилэр. Уолбут үөрүүтэ улахан», — диэн кини кэпсиир.
Санатан этэр эбит буоллахха, Алеша Сокольников Владимир Путины кытары «Быһа холбонууга» эрийэн тиийэн, киниттэн ынаҕы көрдөспүт этэ. Саха сириттэн эрийбит уол көрдөһүүтүн тута телефоҥҥа олорор оператордар сурунан ылан, көрдөһүүнү Саха сирин тыатын хаһаайыстыбатын министиэристибэтигэр ыыппыттар этэ. Ол кэннэ хантан эрийбитэ биллибэт уолчааны, бүтүн Саха сирин үрдүнэн көрдөөбүт этилэр, тоҕо эрэ уол аадырыһын Усуйаана диэн суруйбут буоланнар, буккуур тахса сылдьыбыт. Онтон Алешаны Чурапчы Арыылааҕыттан булан ылбыттар. Уонна бу күн бэҕэһээ көрдөһүүлээх ынаҕы тиэйэн тиэрдэн биэрдилэр.
Кэскилээнэ ааттыын да кэскиллээх! Алеша сүөһүгэ убаммыт оҕо буолан, хотоҥҥо эҥин бэйэтэ сылдьыһар. Дойду бэрэсидьиэниттэн ынаҕы тутар дьэ, үчүгэй диэтэҕиҥ!