Быйыл “Өркөн” оҕону эбии үөрэхтээһин кииниттэн Ил Дархан Харыйатыгар аан маҥнайгытын сылдьар үрдүк чиэс Виолетта Омукчановаҕа, “Magic Kraft” куруһуок иитиллээччитигэр, Мүрү 1 №-дээх оскуолатын 9 кылааһын үөрэнээччитигэр тигистэ.
— Мин кыра эрдэхпиттэн илиинэн оҥоһугу интэриэһиргиибин. Араас таһымнаах күрэхтэргэ ситиһиилээхтик кыттабын. Билигин улахан кылааска тахсан, кыыс оҕо бэйэтин көрүнэ үөрэниэхтээх диэнинэн салайтаран, утумнаахтык дьарыктанан, быйыл WorldSkills күрэххэ “Эстетическэй косметология” хайысхаҕа улууска, өрөспүүбүлүкэҕэ бастакы миэстэни ылан, Россиятааҕы куонкуруска Саранск куоракка ыытыллыбыт чемпионакка Саха Сирин аатын чиэстээхтик көмүскээн, 3 бочуоттаах миэстэҕэ тиксибитим.
Маны таһынан, Виолетта “Кэнчээри” оҕо народнай ансамбылын солистката, “Энергия” спортивнай үҥкүү бөлөҕөр сөбүлээн дьарыктанар.
— Ил Дархан Харыйатыгар кыттыы мин саамай улахан баҕа санаам буолар. Сыралаах үлэм түмүктээх буолбутуттан олус үөрэбин. Саҥа доҕоттордонуом, элбэҕи билиэм-көрүөм. Бу баҕа санаабын толорбут куруһуогум салайааччытыгар Евгения Климентьевнаҕа улахан махталбын тиэрдэбин. Оҕолорго баҕарыам этэ саҥа үүнэр дьылга ситиһиилэри, туруоруммут сыалгытын хайаан да толороргутугар!
Виолетта Омукчанова,
Уус-Алдан улууһун Бороҕон “Өркөн” оҕону эбии үөрэхтээһин киинин иитиллээччитэ