VIII норуоттар икки ардыларынааҕы«Азия оҕолоро» спортивнай оонньууларга аналлаах пресс-кэмпириэнсийэҕэ «Азия оҕолоро» аан дойдутааҕы кэмитиэт президенэ Владимир Максимов, СӨ физкультураҕа уонна спортка миниистирэ Леонид Спиридонов, «Азия оҕолоро» спортивнай оонньуулары бэлэмниир уонна ыытар дириэксийэтин генеральнай дириэктэрин солбуйааччы Михаил Сивцев кытыннылар.
VIII норуоттар икки ардыларынааҕы« Азия оҕолоро » спортивнай оонньуулар 2024 сылга бэс ыйын 25 күнүттэн от ыйын 7 күнүгэр диэри Дьокуускайга барыахтара. Спорт 24 көрүҥэр 224 мэтээл кэмпилиэгэ оонньонуо.
Спорт 16 эбийиэгэ бэлэмнэнэ сылдьар. Дьокуускай Сайсаардааҕы уокуругар элбэх функциялаах спортивнай саала уонна скалодром тутулла сылдьаллар. Скалодром аан дойдутааҕы көрдөбүлгэ барытыгар эппиэттиир. Бу эбийиэк 72 мөлүйүөн суумаҕа Россия олимпиецтарын өйөбүлүн пуондатыттан үбүлэнэр. Урукку тутуулары саҥардыыга 400-тэн тахса мөлүйүөн көрүллэн турар.
«Азия оҕолоро» аан дойдутааҕы кэмитиэт президенэ Владимир Максимов: « Азия оҕолоро » оонньуулар дьиэлэригэр төннөллөр. Онон бу улахан тэрээһин чаҕылхайдык, умнуллубаттык ааһарыгар бары күүспүтүн ууруохтаахпыт. Оонньуулар саҥа таһымҥа тахсыахтаахтар»,- диэн тоһоҕолоото.
Билиҥҥи туругунан 11 дойду кыттарга бэйэлэрин сөбүлэҥнэрин биэрэн тураллар, ол иһигэр — Индонезия, Таиланд, Бутан, Узбекистан, Кыргызстан.
От ыйын 17-20 күннэригэр кэлээччи дойдулар уонна Россия хамаандаларын бэрэстэбиитэллэригэр аналлаах билиһиннэрии сэминээр ыытыллан, күрэхтэр эбийиэктэрин, спортсменнар олорор усулуобуйаларын, аһылыктарын билиһиннэриэхтэрэ.
Бу пресс-кэмпириэнсийэҕэ Леонид Спиридоновка чемпион значогун туттарда. Спорт миниистирэ бэйэтэ 1996 сылга ыытыллыбыт I «Азия оҕолоро» оонньуу кыайыылааҕа буолар. Маннык значок бары призердарга туттарыллар буолуо. Ити курдук, Дьокуускайтан саҕаламмыт «Азия оҕолоро» спортивнай оонньуулар кыттыылаахтара спортка эрэ буолбатах, тус олохторугар үрдүк кирбиилэри ылаллар.