Бүгүн, балаҕан ыйын 24 күнүгэр, Өрөспүүбүлүкэтээҕи кадеттар интэринээт-оскуолаларыгар Арассыйатааҕы экологическай «Экодежурный по стране» аахсыйа чэрчитинэн мас олортулар. Бу айылҕаны харыстыыр сыаллаах Арассыыйа үөрэнээччилэрин хамсааһынын биир сүрүннүүр тэрээһинэ дойдубут бары эригийиэннэригэр ыытыллар.
Быйыл Саха сирэ Уһук Илин эригийэҥҥэ бу бырайыак амбассадорунан талылынна. Биһиги өрөспүүбүлүкэбит эстафетаны Иркутскай уобаластан ылан Ленинград уобалаһыгар тиэрдиэхтээх. Ол аата «Экодежурный по стране» аахсыйа биир эригийиэнтэн атыҥҥа дойдубут нэһилиэнньэтин барытын хабар сыаллаах ыытыллар.
Бүтүн Арассыыйатааҕы аахсыйа СӨ экологияҕа, айылҕа харыстабылыгар уонна ойуур хаһаайыстыбатыгар министиэристибэтин, СӨ ыччат дьыалатыгар уонна социальнай коммуникацияҕа министиэристибэтин, СӨ үөрэх уонна наука министиэристибэтин көҕүлээһиннэринэн ыытылынна.
Бэс маһы интэринээт-оскуола иитиллээччилэрэ — кадеттар уонна Жатайдааҕы 1-нүөмэрдээх орто оскуола иһинэн үлэлиир Арассыыйа үөрэнээччилэрин хамсааһынын чилиэттэрэ олортулар.
Маны таһынан үтүө дьыала тэрээһинигэр СӨ айылҕа харыстабылын министиэристибэтин ойуур хаһаайыстыбатын департаменын салайааччыта Андрей Егорович Михайлов, Арассыыйа үөрэнээччилэрин хамсааһынын эригийиэннээҕи координатора Нюргуяна Владимировна Макарова, Бүтүн Арассыыйатааҕы байыаннай-патриотическай уопсастыбаннай хамсааһын эригийиэннээҕи штабын салайааччыта Александр Николаевич Кузьмин, биллэр уопсастыбынньык, доброволец Антон Васильев, кадеттар интэринээт-оскуолаларын үлэһиттэрэ кыттыыны ыллылар.
«Экодежурный по стране» экологическай аахсыйа чэрчитинэн биһиги өрөспүүбүлүкэбит үрдүнэн оскуола үөрэнээччилэрэ бөҕү-саҕы хомуйан олорор сирдэрин-уоттарын ыраастыыллар, мас олордоллор, айылҕаны харыстыы үөрэнэллэр.
Сиһилии видеоҕа көрүҥ:
Анна СЛЕПЦОВА.
Ааптар хаартыскалара.
Видео Петр МАТВЕЕВ.