«Эркээйи эргиирэ» бырагыраама тула кэпсэтиибитин салгыыбыт. Бүгүн биһиги өрөспүүбүлүкэтээҕи «Кэскил» оҕо хаһыатын эппиэттиир сэкирэтээрэ Вера Прокопьевна Петрова тус санаатын истиэҕиҥ уонна ыҥырыытын ылыныаҕыҥ:
— Ахсынньы 14 күнүгэр “Кэскил” хаһыакка “Эркээйи эргиирэ” оҕо, ыччат сайдар эйгэтин тэрийии бырагыраамаҕа сыһыаран, 10 тыһыынча эксэмпилээринэн анал нүөмэри таһаардыбыт. Бу нүөмэр уһун кэм устатыгар былааннанан, тиэмэ тула элбэхтэ ырытыһан, оскуолалар, педагогтар, төрөппүттэр уопуттарыгар тирэҕирэн оҥоһулунна.
Оҕо иитиитэ хайа да кэмҥэ сүрүн тыын боппуруос. Саха ыччата сайдыы суолун сиэрдээхтик тутустаҕына, омук быһыытынан симэлийиэхпит, тылбытын-өспүтүн сүтэриэхпит суоҕа. Хас биирдии оскуола, педагог оҕону иитиигэ бырагыраамата ураты буолар. Ол эрээри “Эркээйи эргиирэ” онно төһүү күүс буолар.
Ол курдук бу нүөмэргэ «Эркээйи эргиирин» тэрийсэн олоххо киллэрсибит үтүөлээх педагогтар санаалара, бырагыраама оҥкулугар олоҕурбут үөрэнээччи мэтириэтэ, ыччат оскуола, төрөппүт көмөтүнэн личность буолан сайдыбытын туһунан кэпсиир видеолара, оҕону иитиигэ олук буолар А. Павлов-Дабыл Айыы домоҕо, ону тэҥэ дойдубут үрдүнэн туһалаах чек лиистэр киирдилэр.
Маны таһынан keskil14.ru cайтка “Эркээйи эргиирэ” сыһыарыы арыйдыбыт. Бу нүөмэри тутан олорон, аныгы тэтим сиэринэн, QR-куодтары арыйа баттаан сиһилии ааҕан, сайтка санааларгытын үллэстэн суруйуохха сөп буолла.
Бу нүөмэри хас биирдии кылаас салайааччыта, учуутал, төрөппүт остуол кинигэтэ оҥостуон сөп.
Көрүҥ, ааҕыҥ, тускутугар туһаныҥ! Оҕо, ыччат сайдыытын салайсыҥ!