Быйыл сайын Кустуур нэһилиэгэр 3 саастаах оҕо сүтэн, улахан аймалҕан буолбутун истибит буолуохтааххыт.
Оҕону көрдөөһүҥҥэ нэһилиэк олохтоохторо бары туруммуттара. Ол кэмҥэ 9 кылааһы бүтэрбит Вася Другин дьонун кытта оттуу сылдьара. Доҕотторун кытта кырачаан оҕону көрдөөһүҥҥэ кыттыбыта. МЧС-тар кэлэллэрин истэн Алеша Стручковтуун оттуур сирдэригэр төннөн испиттэр. Ол төннөн иһэн ким эрэ ынчыктыыр саҥатын истэ биэрбиттэр. Оҕо барахсан от быыһыгар бадарааҥҥа төбөтө эрэ быган нэһиилэ саҥа таһааран ынчыктыы олорор эбит. Уолаттар оҕону бадараантан ороон, бөһүөлэккэ илдьибиттэр.
Итинник үс саастаах оҕобут көстөн, төрөппүттэрин үөрүүтэ, Васялаах Алешаҕа махталлара улахан. Васябыт быйыл 10-с кылаас үөрэнээччитэ. Оҕо эрдэҕиттэн таба ыстаадатыгар, от үлэтигэр сылдьар. Быйыл Ил Дархан Харыйатыгар ыҥырыллан кыттыыны ылла. Маны таһынан «За проявленное мужество» мэтээли тутта. Бу үөрүүлээх тэрээһиҥҥэ Вася Другины Российскай Федерация сенатора Егор Борисов, Россия МЧС Саха сиринээҕи салаатын кылаабынай управлениетын начальнига Павел Гарин эҕэрдэлээтилэр.
Дьоҥҥо-сэргэҕэ болҕомтолоох, күүс-көмө буоларга куруук аһаҕас, элэккэй үөрэнээччибитигэр истиҥ эҕэрдэбитин, киэн туттуубутун тиэрдэбит.
Валентина КОЛЕСОВА,
Кустуур орто оскуолатын учуутала, Эбээн Бытантай.