Тохсунньу 13 күнүгэр Арассыыйаҕа Бэчээт үлэһиттэрин күнэ бэлиэтэннэ. Онтон ааспыт 2021 сылга биир дойдулаахпыт Варвара Николаевна Угарова 80 сааһын туолбут өрөгөйдөөх үбүлүөйэ буолан ааста.
Варвара Николаевна Угарова РСФСР норуотун үөрэҕириитин туйгуна, СӨ култууратын үтүөлээх үлэһитэ, СӨ бэчээтин туйгуна, ССРС суруналыыстарын сойууһун чилиэнэ, суруналыыстар өрөспүүбүлүкэтээҕи бириэмийэлэрин лауреата, “Суруналыыстыкаҕа кылаатын иһин” суруналыыстар республикатааҕы бириэмийэлэрин лауреата. Кини “Социалистическай куотулаһыы кыайыылаҕа” бэлиэнэн, “Комсомолга актыыбынай үлэтин иһин”, “Пионердары кытта актыыбынай үлэтин иһин” ЫБСЛКС КК бэлиэлэринэн, Саха АССР Үрдүкү Сэбиэтин Президиумун, ССРС, РФ, Саха Республикатын Бочуотунай грамоталарынан наҕараадаламмыта, Горнай улууһун бочуоттаах олохтооҕо. Бу кэрэ бэлиэ даатаҕа анаан Кировскай модельнай библиотека үөрэнээччилэргэ уонна ыччатарга кэтэхтэн IV суруналыыстыка күрэҕин ыытта.
Бу бырайыак ааптарынан СӨ култууратын туйгуна Татьяна Васильевна Иванова буолар.
Күрэххэ Кировскай нэһилиэгин дьаһалтата (баһылык С.И. Данилов), Кировскай орто оскуолата (дириэктэр И.Е. Алексеев), Кировскай модельнай библиотеката, В.Н. Угарова дьиэ кэргэнэ уонна аймахтара, В.П. Аргунова, Т.В. Иванова дьиэ кэргэттэрэ спонсор быһыытынан көмөлөстүлэр.
Күрэххэ Солоҕонтон, Октябрьскайтан уонна Кировскайтан кытыннылар. Уопсайа 19 кыттааччы уонна 23 үлэ киирдэ.
Күрэххэ дьүүлүүр сүбэ чилиэннэринэн үлэлээтилэр: “Үлэ күүһэ” хаһыакка редакторы солбуйааччынан 32 сыл үлэлээбит, Арассыыйа суруналыыстарын союһун чилиэнэ, СӨ бэчээтин туйгуна, Гражданскай килбиэн бэлиэ хаһаайына, Горнай улууһун бочуоттаах олохтооҕо Пономарева Елена Александровна, “Үлэҕэ туйгунун иһин” мэтээл хаһаайката, “СӨ бочуоттаах попечителя” бэлиэ, СӨ норуотун үөрэҕэриитин туйгуна, “Гражданскай килбиэн бэлиэ” хаһаайына, Горнай улууһун бочуоттаах олохтооҕо Аргунова Валентина Прокопьевна, СӨ норуотун үөрэҕэриитин туйгуна Леонтьева Татьяна Алексеевна.
Дьүүлүүр сүбэ түмүгүнэн I бөлөххө (II — IV кылаастарга) Андреева Диана (Кировскай) бастаата, иккис миэстэни Захаров Айсан (Солоҕон), үһүс миэстэни Кривошапкина Нарыйаана (Кировскай) ыллылар.
II бөлөххө (V — VIII кылаастарга) Жиркова Лия (Күөрэлээх) кыайыылаах таҕыста, иккис миэстэ Народов Вася (Солоҕон), үһүс миэстэ Тарасова Дайаана (Кировскай) буоллулар.
III бөлөххө (IX — XI кылаастарга) Потапова Лейла (Солоҕон) бастаата, иккис миэстэни Кондакова Лейла (Солоҕон), үһүс миэстэни Степанова Айлана (Солоҕон) ыллылар.
Ыччаттарга Тарасова Прасковья (Солоҕон) маҥнайгы миэстэни ылла, иккиһи — Леонтьев Семен (Кировскай).
Варвара Николаевна анал бирииһин Потапова Лейлаҕа анаата.
Күндү киһибитигэр Варвара Николаевнаҕа ыарыы ыалласпатын, кырдьыы кыттыспатын, оҕолорун, сиэннэрин истиҥ сыһыаннарыгар угуттанан үйэҥ уһаатын диэн эҕэрдэ тылбытын аныыбыт.
Варвара Николаевна Угарова суруналыыстыкаҕа анал бирииһигэр кыттыбыт оҕолорго, ыччатарга уонна кинилэр салайааччыларыгар махталбытын тиэрдэбит!