Быйыл биһиги Сахабыт сиригэр “Азия оҕолоро” норуоттар икки ардыларынааҕы VIII-с оонньуулар ыытыллаллар. Онно сиэттэрэн Күндэйэттэн төрүттээх Дьокуускай куоракка олорор Иванова Валерия Владиславовнаттан интервью биэрэригэр көрдөстүбүт.
– Бэйэҥ тускунан кылгастык билиһиннэриэҥ дуо?
– Мин Валерия Иванова диэммин, Дьокуускай куорат 28-с нүөмэрдээх оскуолатыгар социальнай педагогунан үлэлиибин.
– «Азия оҕолоро» оонньууларыгар хаһан кыттыыны ылбыккыный? Эйиэхэ инники олоххор туох суолта, өйдөбүл хаалбытай?
– 2004 сыллаахха балтым Светалыын волонтерунан үлэлээбиппит, стадиоҥҥа кураанах бөҕү хомуйуу үлэтэ, хамнастаах этэ. Эпиэтинэстээх буолууга, дьону кытта алтыһарга үөрэммитим дии саныыбын.
– Волонтерунан үлэлээн туох ситиһиилэммиккиний?
– Этэрээппэр «Бастыҥ волонтер» диэн оҕолор бэйэбит испитигэр куоластаан, миэхэ сүрүн бириис тиксибитэ, ол саҕана сыаналаах баттах фена. Билигин да баар, туһалыы сылдьар.
– Оҕо сылдьан спорт ханнык эмэ көрүҥүнэн дьарыктаммытыҥ эбэтэр билигин да дьарыктанаҕын дуо?
– Оҕо эрдэхпиттэн настольный тенниһинэн дьарыктанабын. Сунтаар улууһугар, Бүлүү бөлөх улуустарыгар, Республикаҕа ситиһиилэрдээхпин.
– «Азия оҕолоро», эн санааҕар, оҕолорго, эдэр спортсменнарга туох суолталааҕый?
– Олимпийскай оонньууларга тэҥнээх дии саныыбын, кэлиҥҥи профессиональнай спорт өттүгэр сайдалларыгар маҥнайгы хардыы буолар.
– Спортсмен уонна волонтер оҕолорго, баҕа санааҥ?
– Барыларыгар ситиһиилэри, кыайыы эрэ диэн буолбакка, атын омук оҕолорун кытта билсиһэн, үчүгэй доҕоттору буларгытыгар баҕарабын!
– Кэпсэппиккэр махтал! Үлэҕэр ситиһиилэри!
Карнелия Исагалиева,
9-с кылаас үөрэнээччитэ,
Б.Н. Егоров аатынан Күндэйэ орто оскуолата,
Сунтаар улууһа