«Клуб Ларионовцы» дириҥ силистээх-мутуктаах, элбэх ыччаты иитэн-такайан таһаарбыт оҕо тэрилтэтэ буолар. Педагог-тэрийээччилэр – Людмила Иванова, Евдокия Прохорова, Мирослава Горохова. 2016 сыллаахтан Арассыыйатааҕы үөрэнээччилэр хамсааһыннарын тирэх оскуолата буолан «РДШ» түөрт хайысхатынан бырайыактары олоххо киллэрэн ситиһиилээхтик үлэлиир. Оскуола алын, орто, үрдүкү сүһүөх кылаастара «Түмэн» үөрэнээччилэр сэбиэттэригэр түмсэллэр.
Көхтөөх оҕо тэрилтэтин лидердэрэ саҥа үөрэх сылын тэтимнээхтик саҕалаатылар. Оскуола бэрэсидьиэнин талыы, үгэс быһыытынан, өрөспүүбүлүкэ күнүгэр сөп түбэһиннэрэн ыытыллар. Быйылгы үөрэх сылыгар үс хандьыдаат турда. 10 а кылаастан — Аня Куприянова, 10 б — Миша Андреев уонна 10 в — Слава Тарскай.
Хандьыдааттар үһүөн оскуола тумус туттар үөрэнээччилэрэ буолаллар, научнай-чинчийэр үлэнэн, спордунан утумнаахтык дьарыктаналлар, оскуола чиэһин араас таһымнаах күрэхтэргэ ситиһиилээхтик көмүскүүллэр.
Быыбар хампаанньалара куйаар ситиминэн оскуола инстаграм сирэйигэр ыытылыннылар. Хандьыдааттар «zoom» куйаар түһүлгэтигэр кылаас чаастарга ыалдьыттаатылар, үөрэнээччилэргэ инники былааннарын сырдаттылар.
Куоластааһын түмүгүнэн, кыайыылааҕынан 275 куолас ылан Миша Андреев буолла.
Оҕо тэрилтэтин лидердэрэ Аня Куприянованы уонна Слава Тарскайы оскуола бэрэсидьиэнин солбуйааччытынан таллылар.
Республика биир бөдөҥ оскуолатын бэрэсидьиэнэ буолбут Миша Андреевы кытта инники былааннарын туоһуластыбыт.
— Оскуола лидерэ буолар олус эппиэтинэстээх уонна киһи быһыытынан сайдарга кыах биэрэр. Лидер диэн өрүү инники күөҥҥэ сылдьар киһи. Кини бары өртүнэн дьоҥҥо холобур буолуохтаах. Инникитин, үгэс быһыытынан ыытыллар тэрээһиннэри үйэтитэр, саҥа сүүрээн киллэрэр былааннаахпыт. Оскуолабыт агро, политех, бизнес-инкубатор хайысхаларынан араас бырайыактарга үлэлэһиэхпит. Идэни талыы хайысхатыгар араас дьарыктаах, ситиһиилээх дьону кытта көрсүһүү тэрийиэхпит. Тус бэйэм «Тускул» ырыа, үҥкүү ансаамбылыгар дьарыктанабын, предметнэй олимпиадаларга, «Ворлдскиллс» чемпионатка ситиһиилээхтик кыттабын. Учууталларга, үөрэнээччилэргэ миэхэ куоластаабыккытыгар махтанабын.
Оҕо тэрилтэтин көхтөөх лидердэрэ Ф. К. Попов 100 сааһыгар аналлаах «Герой сулуһа» улуустааҕы бырайыакка үлэлэһэллэр, итиэннэ дистанционнай үөрэнии кэмигэр оскуолабыт Инстаграм-сирэйигэр араас күрэхтэри тэрийэллэр, тэрээһиннэри ыыталлар. Ол курдук, үөрэнээччилэр «Подсолнух хонуута» дьаарбаҥкаҕа, учуутал, ийэ, аҕа, Өрөспүүбүлүкэ күннэригэр аналлаах күрэхтэргэ көхтөөхтүк кытыннылар. «Эн сулускун» диэн музыка кэрэ эйгэтин куоҥкуруһугар биллиилээх ырыаһыттар репертуардарын музыкальнай үнүстүрүмүөн доҕуһуоллаан толордулар.
Бу күннэргэ @larionov_news_school_maya Инстаграммыт сэргэх сирэйигэр аҕалар күннэригэр аналлаах дьиэ кэргэни сомоҕолуур бырайыак күрэҕэ ыытылла турар.
Бу курдук, дистанционнай үөрэнии кэмигэр «Клуб Ларионовцы» оҕо тэрилтэтин лидердэрэ олоҕу кытта тэҥҥэ хардыылаан, сэргэх үлэни ыыталлар.
Саина Лонгинова, Изабелла Романова,
«Мэҥэбил» пресс-киин.