В.П. Ларионов аатынан Майа орто оскуолатын 9 «б» кылааһын уолаттара «Тускул» үҥкүү ансаамбылыгар дьарыктаналлар. Салайааччылар – Лидия Ивановна Артемьева уонна Никандр Леонидович Борисов. 2017 с. Санкт-Петербург куоракка ыытыллыбыт норуоттар икки ардыларынааҕы «Творческие открытия» үҥкүү фестивалыгар кыттан, лауреат аатын ылбыттара уонна да элбэх ситиһиилээхтэр. Ансаамбыл кыттыылаахтара суруйаллар.
Үҥкүү киһи иэйиитин, үтүөҕэ-сырдыкка талаһыытын көрдөрөр. Үҥкүүлээн киһи этэ-сиинэ чэбдигирэр, доруобуйата бөҕөргүүр.
В.П. Ларионов аатынан Майа орто оскуолатын 9 «б» кылааһын уолаттара алын кылаастан «Тускул» үҥкүү ансаамбылыгар дьарыктанабыт. Салайааччыларбыт – Лидия Ивановна Артемьева уонна Никандр Леонидович Борисов. Кылааспыт салайааччыта – Анисия Петровна Варламова. Ордук саха төрүт үҥкүүлэрин толоробут – «Чохчоохой», «Дьиэрэҥкэй», «Эҕэрдэ үҥкүүтэ». Саха үҥкүүтүн хас биирдии хамсаныыта ураты суолталаах, норуоппут үрдүкү Айыыларга, сиргэ-уокка итэҕэлин туоһулуур.
Тыйыс сиргэ олорор саха киһитэ унньуктаах бытарҕан тымныыны тулуйуута, самаан сайыны уруйдуу көрсөрө, ыһыах ыһара, уруу тэринэрэ барыта үҥкүү хамсаныытыгар көстөр.
Учууталларбыт үҥкүү кэрэ эйгэтигэр олус кыһанан уһуйаллар. Мэник-тэник уолаттары алын кылаастан станокка турартан саҕалаан, кыһамньылаахтык дьарыктаан үгүс ситиһиигэ тиэртилэр. 2017 с. Санкт-Петербург куоракка ыытыллыбыт норуоттар икки ардыларынааҕы «Творческие открытия» үҥкүү фестивалыгар кыттан, лауреат буолбуппут. Атын норуоттар үҥкүүлэрин көрөн элбэҕи билэн кэлбиппит.
Өрөспүүбүкэбитигэр үҥкүү хайысхатыгар эр дьон ансаамбылын сайыннарыы көҕүлэнэр. Сыллата чуолаан эр дьон ансаамбылларын көрүү-куоҥкурустар тэриллэллэр. Ол курдук, 2017 сыллаахтан «Сүр көтөҕүү» эр дьон ансаамбылын өрөспүүбүкэтээҕи көрүү-күрэҕэ үгэс быһыытынан ыытыллар. Онно биһиги көтүппэккэ кыттан, сыллата лауреат үрдүк аатын ылабыт.
Күннэтэ дьүккүөрдээхтик дьарыктанан, таһыммытын үрдэтэргэ дьулуһабыт. Өрөспүүбүкэҕэ ыытыллар үҥкүү күрэхтэригэр өрүү ситиһиилээхтик кыттабыт.
Үҥкүү үгүс сыраны, тулуурдаах, дьулуурдаах буолууну эрэйэр. Онон, салайааччыларбытыгар кыһамньыларын иһин махталбытын тиэрдэбит.