В.П. Ларионов аатынан Майа орто оскуолатын 11 кылааһын үөрэнээччитэ Эдик Лукин (салайааччылара Н.Г.Черкашина, О.Е.Давыдова) Мэҥэ Хаҥалас оройуонуттан 1942 с. бэс ыйын 27 күнүгэр 120 хамаандаҕа сэриигэ ыҥырыллан барбыт 318 буойун дьылҕатын чинчийдэ.
Эдик Лукин РФ оборонатын министиэристибэтин киин архыыбын пуондатыгар уурулла сытар докумуоннарынан 163 саллаат бойобуой суолларын үөрэттэ. Ол түмүгэр, 163 киһиттэн 13 киһи тыыннаах ордубутун учууталларын кытта быһаардылар. Саллааттар ханнык байыаннай чаастарга, бойобуой операцияларга кыттыбыттарын, ханна, хайдах өлбүттэрин чопчулаатылар.
Өлбүт буойуннар ортолоругар сураҕа суох сүппүт 4 саллаат дьылҕатын чуолкайдаатылар. Олор истэригэр Доллу нэһилиэгин олохтооҕо Верховцев Семен Михайлович ханна сэриилэспитин, хайдах өлбүтүн, маҥнайгы көмүллүбүт сирин быһааран кыыһыгар 82 саастаах Яковлева Анна Семеновнаҕа биллэрдилэр. 
Докумуоннартан көстөрүнэн, Верховцев Семен Михайлович Сталинград, Орел кыргыһыыларыгар сэриилэспит. 1943 сыл от ыйын 27 күнүгэр Кутузов аатынан Ореллааҕы кимэн киирии операциятыгар сэрии толоонугар сырдык тыына быстыбыт. Орловскай уобалас Сафоново диэн дэриэбинэтигэр көмүллүбүт.Олоҕун тухары буойун аҕата ханна көмүллэ сытарын билиэн баҕарбыт ытык кырдьаҕас долгуйан туран махталын биллэрдэ.
Бу чинчийэр үлэни Лукин Эдик салайааччыларын кытта киэҥ эйгэҕэ таһаардылар. Москва куоракка ыытыллыбт «Леонардо» уонна «Инникигэ хардыы» диэн Россиятааҕы чинчийэр үлэ кэмпириэнсийэлэригэр кыттан, үрдүк таһымнаах экспертэр сэҥээриилэрин ылан кыайыылаах үрдүк аатын сүктэ.
Надежда Гаврильевна уонна Оксана Егоровна 2013 сыллаахтан Мэҥэ Хаҥалас улууһун олохтоохторо Аҕа Дойду улуу сэриитигэр кыттыыларын туһунан чинчийэр үлэни үөрэнээччилэри кытта утумнаахтык ыыталлар.
Сыралаах үлэ түмүгүнэн Улуу Кыайыы 75 сылын көрсө, сэриигэ уолаттарын сүтэрбит ийэлэр ааттарын үйэтитэр сыаллаах «Вечная память матерям Победы» диэн дириҥ ис хоһоонноох өйдөбүнньүк альбому оҥорон бэчээттэппиттэрэ үгүс ааҕааччы сэҥээриитин ылбыта.
Ааптар: Изабелла Романова