В.П.Ларионов аатынан Майа агро хайысхалаах орто оскуолатыгар оҕону үлэнэн иитиигэ улахан болҕомто ууруллар. Үөрэнээччилэр учууталларын салалтатынан оҕуруот аһын арааһын үүннэрэр лааҕырдарга, оскуола учаастагын тэпилииссэтигэр сыллата көхтөөхтүк үлэлииллэр. Мүөттээх ыҥырыаны көрөллөр-истэллэр. Эмтээх оту хомуйан, фитобарга кучу оту, дөлүһүөнү кылааһынан хомуйан, куурдан-хатаран туттараллар.
Үлэни күргүөмүнэн үмүрү тутар оскуола эрчимнээх кэллэктиибэ саҥа үөрэх сылын сомоҕо субуотунньуктартан саҕалаата. Афанасий Бродников, Коммунар Черкашин салалтатынан 9-с, 10-с, 11-с кылаас уолаттара Тураахтаах алааһыгар күрүө тутуутун үлэтин көҕүлүттэн туттулар. Бу сиргэ уопсайа 6 км усталаах оттуур сир күрүөтэ тутуллара былааннанар.
Анисия Варламова, Лина Гоголева, Валентина Кривошапкина салайааччылаах 8-с кылаас уэрэнээччилэрэ Майа алааһынааҕы хайыһар базатын сиригэр хортуоппуйу ороотулар. 10-с кылаас кыргыттара уонна учууталлар саҥа куорпуһу ханапаакылаатылар.
Марфа Семенова, Ираида Шестакова, Александра Гаврильева 7-с кыл үөрэнээччилэрин оҕуруот буорун, эпиилкэни кууллуурга илдьэ сырыттылар, 5-с кылаастар оскуола учаастагын хомуйдулар.
Бу курдук, үөрэҕи-үлэни сэргэ тутар оскуола сэргэх олоҕо күннэтэ күөстүү оргуйар, үтүөҕэ-сырдыкка угуйар.
Изабелла Романова, «Мэҥэбил» эдкорпост салайааччыта.
Майа.
