Билиигэ угуйар
Эрэллээх сирдьиппит
Күн-кэрэ киһибит-
Учуутал, эйиэхэ
Үөрэтэр үтүөҕэр
Муударай сүбэҕэр
Махтанан туранмыт
Истин тыл кэрэтин
Махталбыт ырыатын
Сүрэхпит мичээрин
Аныыбыт эйиэхэ!
Бу үөрүүлээх бэлиэ күҥҥэ бүгүн, алтынньы 3 күнүгэр, В. П. Ларионов аатынан Майа орто оскуолатыгар учуутал күнүгэр аналлаах тэрээһиннэр аастылар. Сарсыардаттан оскуолабыт көхтөөх оҕолоро киирии аантан учууталларын сэмэй бэлэхтээх үөрэ көрүстүлэр.
Оскуола үөрэнээччилэрэ күн устата хас перемена аайы ырыа-тойук, үҥкүү-битии аргыстаах эҕэрдэ нүөмэрдэринэн оскуолабытын толордулар. Оскуола барыта мичээринэн туолла! Учууталлар олус соһуйдулар уонна үөрдүлэр, оҕолор үөрдүлэр-көттүлэр, учууталлары эҕэрдэлии кэлбит төрөппүттэр эмиэ сөҕөн-махтайан бардылар. Бүгүн оскуолабыт олус ураты эйгэлээх буола түстэ. Бүтүн күн устата үөрэнээччилэр учууталларыгар үтүө тылларын, баҕа санааларын, эҕэрдэлэрин эттилэр, сэмэй бэлэхтэрин туттардылар.
Бүгүҥҥү күҥҥэ нэдиэлэ устата бэлэмнэнии ыытыллыбыта. Ол курдук, оҕолор оскуола иһинэн “Обними учителя”, “Селфи с учителем” диэн аныгылыы тэтимнээх видео уһуллулар. Маны таһынан, хас биирдии кылаас таптыыр, убаастыыр бэтэрээн учууталларын үөрүүлээх идэлээх бырааһынньыктарынан эҕэрдэлээтэ, ыалдьыттаата.
Баҕарабыт тапталлаах учууталларбытыгар үрдүктэн үрдүк ситиһиилэри, махталлаах үөрэнээччилэри, хас биирдии күҥҥүт үөрүүнэн, сырдыгынан эрэ сыдьаайдын, чэгиэн-чэбдик доруобуйаны, дьоллоох олоҕу!
Сиһилии видео-матырыйаалбытыгар көрүҥ:
Суруйда, хаартыскаҕа түһэрдэ Лилиана Слепцова, X «б» кылаас
Видеоҕа уһулла, таҥна Лида Кириллина, Х «б» кылаас
«Мэҥэбил» медиа киин эдэр кэрэспэдьиэннэрэ, Майа, Мэҥэ Хаҥалас