Эппэр ийэм үүтүн кытта
Иҥмит эбит, быһыыта,
Кустук өҥнөөх,
Кымыс сыттаах
Сахам мандаар саҥата.
Олунньу 13 күнүгэр ытык-бэлиэ күн буолла. Биһиги сахалыы саҥарар, толкуйдуур Ийэ тылбыт — Саха тылын күнэ үүннэ.
В.П. Ларионов аатынан Майа орто оскуолатыгар төрөөбүт тыл уонна сурук-бичик күнүн бэлиэтээтибит. Үөрүүлээх тэрээһин дойдубут Арассыыйа уонна Саха сирин судаарыстыбаннай былаахтарын көтөҕүүлэриттэн саҕаланна. Оскуола дириэктэрэ Гаврил Николаевич Толстяков эҕэрдэ тылын эттэ. Оскуолабыт талааннаах үөрэнээччилэрэ эҕэрдэ нүөмэрдэринэн киэргэттилэр. Ол курдук, 3-4 кылаас оҕолорун толоруутугар “Саха этигэн тылынан” диэн чабырҕах (сал. В.Ф. Кривошапкина, У.М. Ефремова), Айтал Григорьев 4 “г” кылаас үөрэнээччитин толоруутугар олоҥхо (сал. В.Ф. Кривошапкина, У.М. Ефремова), Иванов Айтал 9 “в” кылаас үөрэнээччитэ сахалыы ырыа (сал. Р.А. Скрябина).
Ону таһынан, 8, 10 кылаас холбоһуктаах бөлөх уолаттара уонна 6 “в” кылаас кэлэктиибэ сахалыы хоһоон аахтылар (сал. М.Н. Семенова, А.Р. Гаврильева, Ф.Н. Шарина). Тэрээһин күпсүүрүнэн, кырыымпанан уонна хомуһунан доҕуһуолланна.
Ийэ тылыгар аналлаах тэрээһин уопсай оһуохайынан түмүктэннэ. Оһуохайы таһаардылар Аман уонна Дархан Жирковтар.
Учууталлар уонна үөрэнээччилэр бары сахалыы таҥастаах киэргэнэн кэлбиттэр. Сарсыардаттан саха тылын холбоһуктаах учууталлара алгыстаах алаадьынан көрүстүлэр уонна күндүлээтилэр.
«Мэҥэбил» пресс-киин, В.П. Ларионов аатынан Майа орто оскуолата.