Тохсунньу 12 күнүттэн үөрэхпит дьыла саамай уһун чиэппэрэ саҕаланна. Уһун саҥа дьыллааҕы өрөбүллэр кэннэ толору сынньанан, күүс-уох ылынан, саҥа үөрэхпит-үлэбит нэдиэлэтигэр түһүннүбүт. Бу нэдиэлэҕэ туох тэрээһин буолла?
Тохсунньу 15 күнэ – Федор Кузьмич Поповка Сэбиэскэй Сойуус Дьоруойа үрдүк аат иҥэриллибит күнэ. Бу бэлиэ күн чэрчитинэн оскуолабыт 5-6 кылаас үөрэнээччилэригэр «Дьоруой суолунан» диэн икки түһүмэхтээх күрэс буолла. Үөрэнээччилэрбит кылааһынан хамаанда туруоран өйү-толкуйу, эти-сиини тургутар түһүмэхтэри аастылар, бэйэлэрин кыахтарын тургуттулар. Түһүмэхтэри бэлэмнээн ыыттылар оскуолабыт бибилэтиэкэрдэрэ — М.Д. Хабарова, Л.С. Жегусова, ОБЗР учуутала Н.Л. Борисов.
Маны тэҥэ оскуолабытыгар таҥха күннэрин баттаһа 6 кылаас оҕолоругар таайтарыылаах таҥхаҕа анаан инникини түстүүр кыра баайыылаах таайтарыылаах оонньуулар ыытылыннылар. Таҥха – Күрүө Дьөһөгөй Айыы сэттэ ини-биилэриттэн биирдэстэрэ. Таҥха ааспыты аттаран, былыргыны ырытан, билиҥҥи олоҕу кытта тэҥнии тутан, кэнэҕэски кэлэр кэмнэри кэскиллээн көрөр улаҕалаах өйдөөх таҥара диэн саха билиҥҥи чинчийээччилэрэ быһаараллар.
Бу сылтан Тохсунньу ый 17 күнүгэр Арассыыйаҕа аан бастакытын артыыс күнэ бэлиэтэнэр буолбут. Бу бэлиэ күн чэрчитинэн В. П. Ларионов аатынан Майа оскуолатын оҕолоругар Д. Ф. Ходулов аатынан норуот айымньытын дьиэтин артыыстара уонна А.Д. Макарова аатынан култуура уонна ускуустуба кэллиэһин устудьуоннара ыалдьыттаан бардылар. Артыыстар бэйэлэрин уоппуттарын, бырайыактарын туһунан кэпсээтилэр, санааларын үллэһиннилэр, устудьуоннар киһи өйүн, этин-сиинин эрчийэр тренинг ыыттылар. Олус интэриэһинэй көрсүһүү буолан ааста.
Маннык курдук тэтимнээхтик саҥа үөрэхпит чиэппэрэ саҕаланна.
Суруйда Кира Павлова, 10 «б» кылаас үөрэнээччитэ, “Мэҥэбил” медиа киин,
В.П. Ларионов аатынан Майа оскуолата, Мэҥэ Хаҥалас,
уһулла: Кира Павлова, 10 «б» кылаас үөрэнээччитэ,
кэрэспэдьиэннэр: Милена Гаврильева, Эдуард Романова, 10 «б» кылаас үөрэнээччилэрэ,
таҥан оҥордо: Лилиана Слепцова, 10 «б кылаас үөрэнээччитэ