Балаҕан ыйын 26 күнүгэр, Саха Сирин судаарыстыбыннаһын күнүгэр сыһыаран, оскуола бэйэни салайыныы лидерин талыы быыбара бэрт тэрээһиннээхтик ыытылынна. Быыбарга барыта 3-11 кылаас үөрэнээччилэрэ, оскуолабыт учууталлара, үлэһиттэрэ, уопсайа 507 быыбардааччы кыттыыны ылла.
Хандьыдааттарынан Петров Дьулустан (10б кылаас), Сыромятникова Шура (10б кылаас) уонна Лыткин Эдик (10в кылаас) турбуттара. Хас биирдии хандьыдаат бэйэтин сыалын-соругун, инники былааннарын оҕолорго билиһиннэрбитэ.
Куоластааһын түмүгүнэн, Сыромятникова Шура, 10б кылаас үөрэнээччитэ, лидеринэн талылынна.
Оттон оскуолабыт лидерин сүрэхтээһин сарсыҥҥы күнүгэр, балаҕан ыйын 27 чыыһылатыгар, ыытылынна. Ону тэҥэ, тэрээһиҥҥэ ааспыт үөрэх дьылыгар ситиһиилээхтик үлэлээбит уонна оскуоланы бүтэрээри сылдьар оҕолорбутугар, 11 кылаас үөрэнээччилэригэр, оскуола аатыттан махтал суруктар туттарылыннылар.
Тэрээһини «Ларионовтар» оҕо хамсааһынын активистарын флешмоб үҥкүүлэрэ киэргэттэ.
Хамаандаларга арахсан квест-оонньуулаах, үҥкүүлээх-битиилээх бэрт сэргэх, биир умнуллубат тэрээһин ааста.
Саҥа талыллыбыт оскуолабыт лидеригэр итии-истиҥ эҕэрдэ тылларын этэбит, таһаарыылаах үлэни баҕарабыт!
Солдатова Нарыйа, Скрябина Сандаара, XI кылааһын үөрэнээччилэрэ,
«Мэҥэбил» пресс-киин, Майа, Мэҥэ Хаҥалас