Ууттан эмсэҕэлээбит Дьааҥы улууһун оҕолоро билигин Дьокуускай лааҕырдарыгар, ону таһынан «Орленокка» сынньана сылдьаллар. Ууттан улахан хоромньуну ылбыт Боронук нэһилиэгин оҕолоро билигин «Бэс чагда» оҕо сынньанар уонна чэбдигирэр киинигэр бааллар. Биһиги оҕолору кытары кэпсэттибит.
Ливия ДРУГИНА, 14 саастаах:
— Биһиги сынньанар сменабыт «Россия — страна возможностей» диэн ааттаах. Бастаан кими да билбэт буоламмыт, наһаа тэһийбэт курдук этибит. Онтон кэнники оҕолору кытары билсиһэн, кэпсэтэн наһаа үчүгэй буолла, астынныбыт. Лааҕырга усулуобуйа өттүгэр барыта үчүгэй, күҥҥэ 5-тэ аһыыбыт, күүлэйдиибит. Олус үчүгэй иитээччилэр уонна баһаатайдар үлэлииллэр, ол эрээри биһиги блокпут баһаатайа — Дайаана барыларыттан таһыччы үчүгэй. Биһиги кинини наһаа сөбүлээтибит.
Маны таһынан күн аайы араас тэрээһиннэр, дьарыктар тэриллэллэр, сороҕор куоракка күүлэйдии тахсабыт, холобур, пааркаҕа уонна бассейнҥа сылдьыбыппыт. Бастаан лааҕырга кэлбит күммэр дьиэбэр наһаа барыахпын баҕарбытым, онтон билигин сменабыт бүтэрин баҕарбаппын. «Бэс чагда» лааҕырга сайдыыны-үүнүүнү баҕарабын.
Лена ЗАБОРОВСКАЯ, 14 саастаах:
— Биһиги от ыйын 16 чыыһылатыгар лааҕырга киирбиппит, бэйэм улууһум сорох оҕолорун эрдэттэн билэр буоламмын, тута кэпсэтэн барбытым. Манна Дааҥы улууһун ууга барбыт бөһүөлэктэриттэн уопсайа сүүстэн тахса оҕо баар. Бу лааҕырга биһиги үксүн оонньуубут, араас экскурсияларга сылдьабыт. Холобур, пааркаҕа сылдьан араас аттракционнарга оонньообуппут. Өссө «Чолбон» диэн сөтүөлүүр комплекска бара сылдьыбыппыт.
Күн ахсын оҕолору кытта мунньустан гитара акустикалаах ырыалары ыллыыбыт, ону тэҥэ волейболлуубут, онтон уолаттар футбол оонньууллар. Баһаатайдарбытыгар Дайаанаҕа, Вероникаҕа, Сашаҕа уонна баспытааталбытыгар Ирина Александровнаҕа улахан махталбытын тиэрдэбит.
Бары билэрбит курдук, быйыл от ыйыгар Дьааҥы улууһа улахан ууга баран, олохтоохторго хоромньуну аҕалла. Билиҥҥитэ олорор дьиэлэри, социальнай объектары чөлүгэр түһэрии үлэтэ ыытылла турар. СӨ Бырабыыталыстыбата ууттан эмсэҕэлээбит нэһилиэктэр олохтоохторун — оҕолору, кырдьаҕастары лааҕырдарга, санаторийдаргы ыытан улахан өҥөнү оҥорор. Оҕолорго туһалаах сынньалаҥы, үтүө күннэри баҕарабыт.
Боронук нэһилиэгэ, от ыйа, 2022 с. МЧС сулууспатын түһэриитэ.
Анна СЛЕПЦОВА.