Сайыына Егорова IX “В” кылааска үчүгэйдик үөрэнэр. Соторутааҕыта
өрөспүүбүлүкэҕэ 2007-2008 сыллаах төрүөх кыргыттарга ыытыллыбыт
сүүрүү күрэҕэр икки дистанцияҕа призер аатын ылары ситиспитэ. Сүүрүүнэн
кыра сааһыттан дьарыктанар. Бастаан уһуйбут киһитэ ийэтэ Дария
Александровна.
Кыра эрдэхтэриттэн тэҥҥэ илдьэ сылдьан, бөһүөлэк иһинээҕи
арыыларга, кэлин саҥа стадион тутуллан, онно киирэн Дария Александровна
кыргыттарынаан, сороҕор аҕаларын кытары сүүрэр эбиттэр. Кыргыттар
иккиэн билигин улуус биир күүстээх спортсменкалара буоллулар,
улуустарын чиэһин улахан күрэхтэһиилэргэ чиэстээхтик көмүскүүллэр.
Сайыына сүүрэр дистанциялара 1,5 уонна 3 км. Бу дистанцияларга балта
Диана эмиэ сүүрэр. Диана билигин “Азия оҕолоро” Оонньууларга
сүүмэрдиир күрэхтэһиилэргэ сүүрэ сылдьар, табылыннаҕына,
өрөспүүбүлүкэ сүүмэрдэммит хамаандатыгар киириэ.
Сайыына быйыл күһүҥҥүттэн уонча өрөспүүбүлүкэтээҕи уонна илин
эҥээр улуустар улахан сүүрүүлэригэр балачча ситиһиилээхтик кытынна.
Мантан саас аны СГЭ эксээмэннэрин туттарыа. Кини сүүрүүнэн эрэ
дьарыктаммат, биир сөбүлүүр дьарыга—уруһуй. Кыһыл дипломунан
музыкальнай оскуола уруһуй кылааһын бүтэрбитэ. Айылҕаҕа элбэхтик
сылдьар буолан, айылҕа кэмнэрин араас көстүүлэригэр ордук абылатар.
Күнэ сарсыарда Мындааба бөһүөлэгиттэн хааман кэлэн, Бороҕоҥҥо
үөрэнэртэн саҕаланар. 4 чаастан киэһэ саҥа тутуллубут спортсаалаҕа 2,5 чаас
дьарыктанар. Билигин сүүрүүгэ тренерэ Мария Слепцова. Сүүрүк кыыс
Сайыынаҕа өссө үрдүк ситиһиилэри баҕарабыт.
Милена Платонова, Мүрү 1 №-дээх орто оскуолатын VIII кылааһын
үөрэнээччитэ, Уус Алдан