Уус Алдаҥҥа «Рисуем все» бырайыак Иван Мигалкин дойдутуттан саҕаланна

Уус Алдан улууһугар алтынньы 15-17 күннэригэр саха норуотун поэта, оҕо суруйааччыта Иван Васильевич Мигалкин төрөөбүтэ 70 сааһыгар аналлаах олус элбэх тэрээһиннэр, быыстапкалар буоллулар.

Ол курдук алтынньы 15 күнүгэр Иван Васильевич аҕата Василий Николаевич Мигалкин аатын сүгэр Чараҥ орто оскуолатыгар «Сардааналаах кыысчаан» диэн улуустааҕы уруһуй күрэҕэ буолан ааста. Күрэх үөрүүлээх арыллыытыгар Чараҥ оскуолатын дириэктэрэ Николай Григорьевич Бурцев, 1 Хоро нэһилиэгин баһылыга Василий Васильевич Бурцев эҕэрдэ тылларын эттилэр.

Бу күн Саха өрөспүүбүлүкэтин бастакы Президенэ Михаил Ефимович Николаев «Рисуем все» бырайыага Таатта улууһуттан кэлэн, Уус Алдан улууһугар саҕаламмытын туһунан биллэрдилэр.

Улуустааҕы үөрэх управлениетын солбуйааччыта Иван Иванович Никонов «Рисуем все» бырайыак бэлиэтин Чараҥ оскуолатын дириэктэригэр Николай Григорьевич Бурцев туттарда. «Биһиги бастакы Президеммыт Михаил Ефимович Николаев «Рисуем все» бырайыага Уус Алдан улууһугар Иван Васильевич Мигалкин дойдутуттан 1 Хоро нэһилиэгиттэн саҕаланар уонна улуус бары нэһилиэктэригэр салҕанан ыытыллыаҕа», – диэн Иван Иванович Никонов эттэ.

Салгыы Иван Васильевич Мигалкин бииргэ төрөөбүт быраата Афанасий Васильевич Мигалкин оҕолорго анаан үтүө тылын тиэртэ: «Уруһуй уонна тыл ыкса сибээстээхтэр. Уруһуйу сатаан ааҕар, өйдүүр киһи үтүө киһи буолар».

Чараҥ оскуолатын үөрэнээччилэрэ ыалдьыттарга Иван Мигалкин хоһооннорун аахтылар, поэт ырыа буолбут хоһооннорун ыллаан иһитиннэрдилэр.

Уруһуй күрэҕэ үс хайысханан ыытылынна: I-IV, V-VIII, IX-XI кылаастар. Уопсайа 106 оҕо кыттыыны ылла. Оҕолор үлэлэрин I-IV кылаастарга Сардаана Иннокентьевна Ушницкая, V-VIII кылаастарга Федот Константинович Колодезников, IX-XI кылаастарга Прокопий Михайлович Колодезников бэрэссэдээтэллээх дьүүллүүр сүбэлэр сыаналаатылар.

Иван Васильевич Мигалкин Н.Е. Мординов-Амма Аччыгыйа аатынан «Кэскил» оҕо бэчээтин кыһатын кытта олоҕун тиһэх күннэригэр диэри ыкса сибээстээхтик үлэлээбитэ. «Чуораанчык», «Колокольчик» оҕо сурунаалларыгар остуоруйалара, хоһоонноро элбэхтик бэчээттэммитэ.

Ону сыаналаан тураммыт биһиги, «Кэскил» медиа оскуола юнкордара, бэйэбит сөбүлээбит үлэлэрбит ааптардарыгар Иван Мигалкин «Чуораанчык», «Колокольчик» сурунаалларга бэчээттэммит остуоруйаларын дьэрэкээн ойууларын хартыына гынан бэлэх туттардыбыт.

Биһиги бэлэхпитин I-IV кылаастарга Уйгулаана Копырина, V-VIII кылаастарга Юлияна Лепчикова, IX-XI кылаастарга Олеся Крылова тутан үөрбүттэрэ буолуо диэн эрэнэбит.

Павел ГЕРАСИМОВ, VIII кылаас, Янис СЫСОЛЯТИН, VII кылаас

Родион Перевалов хаартыскалара, VIII кылаас

«Sitim LegMedia» хамаанда юнкордара, Лөгөй лиссиэй-интэринээт, Уус Алдан