От ыйа – иччилээх олох ыйа. Бу ыйга иччилээх олох дьылҕанын тутуһабыт. Аан Алахчын иччилээх олоххо кэби, куту-сүрү олордор кэмэ үүннэ.
Мала: холумтан, чороон, кытыйа, саламалаах чэчир.
Манньыта: Үрүҥ кыл, кымыс, саламаат.
Туом хаамыыта.
Айыы суолугар хайыһыы. Бахсы үстэ дэйбиири үөһэ дук гынар. Холумтаҥҥа уот саҕар.
Айыы суолугар уонна Аан Алахчын хотуҥҥа туһулаан кымыстаах чороону көтөҕөн бахсы алгыһы саҕалыыр.
-1-
Дьээ-буо!
Алака-чалака!
Айыы суолунан
Айгылаах олох
Үрүҥ тыына
Үрүҥ былыт буола
Бэттэх буол.
Үрүҥ сылгы
Үүт маҥан кылынан
Күндүлээн эрэбин.
Айхал, айхал, айхал.
Бу кэнниттэн Айыы суолугар бахсы сүгүрүс гынар. Аан Алахчыҥҥа анаан холумтаҥҥа саламаат кутар уонна алгыһы салгыыр.
-2-
Дьээ!
Алам-чалам!
Буор иччитэ
Аан Алахчын
Хотун ийэ
Үрүҥ былыты
Үрүҥ күлүк гына
Бэттэх буол.
Мичик аллай,
Истэ сэргэҕэлээ,
Арыылаах саламаатынан
Айах тутан эрэбин.
Ытык тылбын ыл,
Сүҥкэ тылбын көтөх.
Дуом айхал.
Домнооһун кэнниттэн бахсы холумтаҥҥа сүгүрүс гынар уонна алгыһы салгыыр.
-3-
Көхсүттэн көнтөстөөх
Күн өркөн ууһа,
Арҕаһыттан тэһииннээх
Айыы хаан аймаҕа
Арыаллаһар аналлаах
Айыы санааны арыйан,
Ааттаан-тускулаан
Маннык диэн
Аманыйан эрэбит.
-4-
Дьээ!
Намыл күөгэл,
Хатыҥ нуоҕай,
Аан Алахчын
Хотун ийэм
Айыы суолугар
Алгыһынан хайыһан
Айыы дьүһүл кэбин кэттэ.
Иэхэй-чуохай,
Нарын-наскыл !
ххх
Үтүө бити биттэннэ,
Байдам олоҕу билгэлэннэ.
Иэхэй-чуохай,
Нарын-наскыл!
ххх
Таҥхаланна,
Дьылҕаланна.
Иэхэй-чуохай,
Нарын-наскыл!
ххх
Ыйаахтанна,
Оҥоһууланна.
Иэхэй-чуохай,
Нарын-наскыл!
ххх
Төрөл төлкө
Төргүүлэннэ.
Иэхэй-чуохай,
Нарын-наскыл!
Дьээ!
Намыл күөгэл,
Хатыҥ нуоҕай,
Аан Алахчын
Хотун ийэм
Айыы суолугар
Алгыһынан хайыһан
Айыы дьүһүл кутун кууста.
Иэхэй-чуохай,
Нарын-наскыл !
ххх
Дьээ !
Намыл күөгэл,
Хатыҥ нуоҕай,
Аан Алахчын
Хотун ийэм
Айыы суолугар
Алгыһынан хайыһан
Айыы дьүһүл
Сүрүн сүһүннэ.
Иэхэй чуохай,
Нарын-наскыл !
Дьээ !
Намыл күөгэл,
Хатыҥ нуоҕай,
Аан Алахчын
Хотун ийэм
Айыы суолугар
Алгыһынан хайыспыккар
Мааны ааккар махтаат,
Албан ааккар айынаат.
Дом.
Алгыс бүппүтүн кэннэ туомҥа баар дьон дэйбиири өрө тутан үстэ тускулуур уонна үстэ «АЙЫНААТ» диир.
Ааптар: Анатолий Павлов — Дабыл