Быйыл дойду үрдүнэн Комсомол 100 сыла өрө күүрүүлээхтик бэлиэтэннэ. Биһиги оскуолабыт бу күҥҥэ анаан декада ыытта. Ол курдук, Комсомол 100 сылыгар аналлаах кылаас чаастара буоллулар. Бэтэрээн учууталлартан комсомол сылларын туһунан ахтыылары хомуйдубут, урукку киинэлэри, сэбиэскэй кэмнээҕи оҕо тэрилтэтин сырдатар планшеттары, монтажтары көрдүбүт.
История методическай бөлөҕүн учууталлара ООН технологиятынан дебаттары VII-XI кылаастарга ыыттылар. Оскуола музейын иһинэн быыстапка тэрилиннэ, библиотекарь Н.В. Колесова пионерскай, комсомольскай үлэлэр тустарынан видеороликтары көрдөрдө.
Учууталбыт Н.В. Петрова маннык кэпсиир: «Биһиги кыра кылаастан октябренок, пионер, комсомол тэрилтэлэригэр иитиллэн тахсаммыт, партия, Ленин диэн тылларынан салайтаран, олус элбэххэ үөрэммиппит. Хас биирдии оҕо, эдэр ыччат эппит тылбытыгар дьулуурдаахтык турарга, коллективтан туора турбакка, хас биирдии киһи туһугар биир санаанан сылдьарга, куруук көмөҕө бэлэм буоларга үөрэммиппит. Оннук иитиллибит буоламмыт, күн бүгүҥҥэ диэри сөптөөх хайысханы тутуһан үлэлээн, олорон кэллибит”, — диэн кэпсээтэ.
Мин бу Комсомол күнүгэр анаан ыытыллыбыт тэрээһинтэн олус астынным. Саамай өйдөөн хаалбытым — учууталларбыт ол саҕанааҕы оҕо тэрилтэтин билиһиннэрэн, оччотооҕу сбору оонньоон көрдөрбүттэрэ буолар. Ол курдук, линейкаҕа диктор саҥарбытын кэннэ, горн, барабаан доҕуһуолунан киирэннэр, речевка, рапорт эттилэр, ырыа ыллаатылар. Кинилэр октябренок, пионер, комсомол саастарыгар ыытыллар маннык сбордар олус ньиргиэрдээхтик бараллар эбит. Үөрэх завуһа Александра Алексеевна Неустроева, пионерскай дружина сэбиэтин бэрэссэдээтэлэ, хайдах курдук чуордук рапорт биэрэрин, дружина этэрээттэрин салайарын, хас биирдии этэрээт барытын чуолкайдык толорорун сэҥээрдибит.
Бу күн биһиэхэ “Сулустаах эстафета” бэтэрээн комсомолецтара уонна улуус, нэһилиэк эдэр ыччатын салайааччылара күндү ыалдьыт буоллулар. Тааттыныскай нэһилиэк бэтэрээннэрин сэбиэтин салайааччыта М.Е. Бондарева бэйэтин эҕэрдэтин тиэртэ уонна бастыҥ комсомолецтарга үбүлүөйдээх сыл мэтээлин туттарда. Алексеевскай оройуон комсомольскай кэмитииэтин солбуйар сэкирэтээрэ Д.В. Попова оскуола үөрэнээччилэригэр туһаайан кэс тылын эттэ уонна “Сайдам” оҕо тэрилтэтин салайааччытыгар, IX кылаас үөрэнээччитэ Даша Васильеваҕа өйдөбүнньүк бэлиэни туттарда. Бэтэрээннэр актыбыыс оҕолорго значоктары ииллилэр. Харда тылы Даша Васильева: “Урукку үтүө үгэстэри тутуһан, дойдубут баай историятын бастыҥ үөрэхпитинэн, үлэбитинэн салгыахпыт”, — диэн эрэннэрдэ.
Ася Новгородова, Х “б” кылаас үөрэнээччитэ.
Ытык Күөл, Таатта.