Ахсынньы 24-25 күннэригэр 2021 с. Мэӊэ-Хаӊалас улууһун Чыамайыкы нэһилиэгин С.Н.Михайлов аатынан орто оскуолата үйэлээх үбүлүөйүн бэлиэтээтибит.
Тэрээһиммит бастакы күнүгэр улууспут баһылыга Старостин Н.П., улуус баһылыгын социальнай боппуруостарга солбуйааччыта Свинобоев М.А., тыа хаһаайыстыбатын начальнига, бэйэбит выпускникпыт Семенов И.Е., үөрэҕирии салалтатын начальнига Черкашина И.В., араас сылларга оскуолабыт директордарынан үлэлээбит Сивцев П.Д., Белолюбскай Ф.Ф., үөрэҕирии салалтатын үлэһиттэрэ Луковцева А.Р., Габышева Л.С., Варламова Н.А., КМО-бут директордара Петров М.В., Денисов В.П., Петров Н.А. уонна өр сылларга үлэлии сылдьыбыт ветеран үлэһиттэрбит ыалдьыттыы кэлбиттэрэ. Үбүлүөй үөрүүлээх чааһа Саха сирин гимнинэн саҕаламмыта. Ытыктыыр-убаастыыр ветераннарбытын, учууталларбытын, оскуолабыт үлэһиттэрин наҕараадалааһын буолбута.
Оскуола үөрэнээччилэрэ музыкальнай эҕэрдэлэргэ сүрдээх үчүгэйдик кыттыбыппыт. Ырыаһыт оҕолор Чыамайыкы оскуолатын «Өрөгөй» ырыатын ыллаабыттара.
«Үрүйэчээн» үҥкүү бөлөҕүн иитиллээччилэрэ «Эҕэрдэ үҥкүүгүнэн» ыалдьыттары көрсүбүттэрэ (сал. Прокопьева З.Н.). Выпускник уолаттар Макаров Айаал, Фёдоров Илья уонна оскуола лидера Артём Прокопьев үөрэнээччилэр ааттарыттан мэктиэ тыл эппиттэрэ. Ыалдьыттар «Үлэлээбит, үөрэммит үтүө кэмнэрбит» выставканы сэҥээрэ көрбүттэрэ, минньигэс астаах сандалыга олорон урукку кэмнэрин санаан-ахтан ылбыттара. Оскуола-сад үлэһиттэрэ, учууталлар, оҕолор, төрөппүттэр, нэһилиэк дьаһалтата бары ылсаннар, кыһалланнар, олус үчүгэй тэрээһин буолан ааспыта.
Иккис күнүгэр үөрэнээччилэргэ үөрүүлээх линейка буолбута. Онно оскуолабыт Өрөгөй ырыатын видеоклибыни сүрэхтэниитэ ааспыта. Директор эбээһинэһин толорооччу Романова Л.Е. «Оскуола сайдыытыгар аарыма үтүөлэрин иһин» знак оҥотторон тустаах дьоҥҥо туттартаабыттарын иһитиннэрбитэ. Оскуолабыт бастакы медалистката Саргылаана Седалищева (Захарова) ыыппыт эҕэрдэтин көрбүппүт. Үөрэнээччилэргэ саамай үөрүүлээх түгэнинэн буолбута — улахан үбүлүөйдээх торт, бырааһынньыктааҕы остуол уонна уоттаах-күөстээх «Мин тапталлаах оскуолам» фотозона аһыллыыта.
Оскуолабыт өрөгөйдөөх юбилейа олус үчүгэйдик ааста, бары үөрэ-көтө кытынныбыт, бырааһынньыктаатыбыт.
Оскуолабытын өрөгөйдөөх үбүлүөйүнэн учууталларбытын, үөрэнээччилэри эҕэрдэлиибит. Тапталлаах оскуолабыт үүнэ, сайда тур.
Чыамайыкы орто оскуолатын «Проба пера» эдэр кэрэспэдьиэннэрэ