Республикатаа±ы «Чуораанчык», «Колокольчик» оҕо сурунаалларын редакцията 2018 сыл иккис аҥарыгар сурутуу хампаанньатын чэрчитинэн, «Тус бэйэҕинэн холобур буол» диэн акцияны ыытар. Акция сыала-соруга оҕо ааҕар эйгэтин тэрийиигэ республика биллэр-көстөр дьонун болҕомтолорун туһаайыы буолар.
Бу акцияны биир бастакынан республика биллэр урбаанньыттара Руслан Еремеевич Федотов уонна Афанасий Павлович Алексеев өйөөтүлэр.
Руслан Еремеевич дойдутугар Амма улууґун II Чакыр нэґилиэгэр «Ньургуһун» уһуйаан саҥа дьиэҕэ киирбит үөрүүлээх түгэнигэр түбэһиннэрэн, уһуйаан бары иитиллээччилэригэр анаан 55 устуука «Чуораанчык» оҕо сурунаалын суруйтарда.
Онтон «Японец» маҕаһыын хаһаайына Афанасий Павлович Алексеев аҕатын төрүт дойдутугар Амма улууґун Өнньүөс нэһилиэгин кырачаан олохтоохторугар – «Дуораанчык» уһуйаан 25 иитиллээччитигэр уонна социалистическай үлэ Геройа Петр Ионович Яковлев аатын сүгэр Амма-Наахара орто оскуолатын 25 үөрэнээччитигэр анаан «Чуораанчык» оҕо сурунаалыгар сурутууну бэлэхтээтэ.
Республика Доруобуйатын харыстабылын миниистиринэн ситиһиилээхтик үлэлээбит, республика доруобуйатын харыстабылын эйгэтин биир убаастанар, ытыктанар киһитэ Вячеслав Лаврентьевич Александров үөрэммит оскуолатыгар — В.Г. Короленко аатынан Амма 1 №-дээх оскуолатын библиотекатыгар анаан «Чуораанчык», «Колокольчик» сурунааллары сурутан бэлэх уунна.
— Биһиги биир дойдулаахтарбытыгар Р.Е. Федотовка, А.П. Алексеевка дириҥ махталбытын тиэрдэбит. Бу акция оҕо ааҕар эйгэтин тэрийиигэ үтүө түмүктэрдээх буолара биһигиттэн, иитээччилэртэн, учууталлартан, улахан тутулуктаах. Босхо сурутууну тутуу оҕону кытта үлэҕэ эппиэтинэспитин үрдэтэр, — диэн II Чакыр нэһилиэгин «Ньургуһун», Амма-Наахара «Дуораачнык» уһуйааннар сэбиэдиссэйдэрэ Д.А. Лукина, П.П. Кононова уонна Герой Яковлев аатын сүгэр Амма-Наахара орто оскуолатын директора М.П. Макарова санааларын үллэстэллэр.
Сардаана МАТВЕЕВА.