Амма улууһун народнай поэт В.М. Новиков-Күннүк Уурастыырап аатынан Эмис орто оскуолатын учуутала Борис Сергеевич Яковлев быйылгы үөрэх дьылын уратытык саҕалаата. Кини 8 уоллаах бэһис кылаастарга салайааччы буолла. Борис Сергеевичка маннык түгэн тосхойбута мээнэҕэ буолбатах. Кини уол оҕону иитиигэ туспа суоллаах-иистээх учуутал. Онон бу хайысхатын кэҥэтэн, саҥа таһымҥа таһааран уол оҕону кытта ыкса үлэлэһэригэр өссө улахан кыах бэрилиннэ.
11-12 сыл аннараа өттүгэр Эмис нэһилиэгэр аҕыс уол биир кэмҥэ күн сирин көрбүттэрэ, кырдьык, ураты, сонун көстүү этэ. Уолаттар игирэ Семен, Степа Степановтар, Коля Дмитриев, Дима Захаров, Эрчим Николаев, Баир Ларионов, Коля Солдатов, АлгыстаанмПестерев оҕо саадыттан бииргэ тутуспутунан сылдьан, салгыы алын кылааска Татьяна Герасимовна Неустроеваҕа үөрэнэн, быйыл орто сүһүөххэ таҕыстылар.
Нэһилиэк олохтоохторо уолаттарын астына, хайгыы, саха сиэринэн харыстыы көрөллөр. «Этэҥҥэ тыыллан-хабыллан таҕыстахтарына, хойутун- хойут дойдуларын аатырдар уолаттар буолуохтара», — диэн ураты харыстабыллаахтык сыһыаннаһаллар. Оҕолор үөрэххэ, үлэҕэ, күрэххэ ситиһиилэрэ үгүс. Биир дойдулаахтарын харыстабыллаах, үтүө сыһыаннарыгар тирэҕирэн этэҥҥэ үүнэн-үрдээн истиннэр!
Эмис орто оскуолатын V кылааһын үөрэнээччилэрэ, төрөппүттэрэ бастакы учууталларын Татьяна Герасимовна Неустроеваны, кылаастарын салайааччытын Борис Сергеевич Яковлевы Учуутал күнүнэн истиҥник эҕэрдэлииллэр! Учуутал төрөппүтү кытта бииргэ үлэлээһинигэр махтанан туран, эһиги сыралаах үлэҕитигэр ситиһиилэри баҕараллар.
Ааптар: Сардаана Матвеева.