Лидия Аргунова ис иһиттэн ураты дьоҕурдаах, барыга-бары талааннаах. А.Е. Мординов аатынан гимназияны үөрэнэн бүтэрбит оскуолатыгар төрүт култуура учууталынан айымньылаахтык үлэлээбитэ. Биир кэм сайдар, үүнэр суолу тобулан, Иван Аргунов аатынан киин бибилэтиэкэҕэ сүрүннүүр исписэлиис. Үөрэппит үөрэнээччим, бииргэ үлэлээбит кэллиэгэм, аны уус-уран ааҕар балаҕан эйгэтигэр алтыһа сылдьар доҕорум араас таһымнаах куонкурустарга куруутун кыттар. Ол курдук“Күн Чөмчүүк” норуот уус-уран айымньытын кэлэктиибэр дьарыктаммыта балай да буолла.
Ансаамбылынан Саха сирин аатыттан кыттан, бүтүн арассыыйатааҕы бэстибээлгэ долгутуулаах куонкуруһу ааһан, Кылаан Чыпчаал үрдүк аатын ылары ситистэ. Буүрээтийэҕэ тиийэ айаннаан, сиэдэрэй таҥас-сап тиктэрэн, уһун унньуктаах айаны билиммэккэ, уон далбар хотун уонна икки эр хоһуун кыайыы-хотуу өрөгөйүн биллилэр. “Култуура” национальнай бырайыагынан МТ “Таатта улууһа” икки мөлүйүөн сууммалаах туоһу суругун Сахаяна Григорьевна Колодезникова салайар бөлөҕөр туттардылар.Лауреат үрдүк аатын ылбыт “Күн Чөмчүүк” ансаамбылга урааҥхайдыы Уруй туһаайабыт, сахалыы Айхал аныыбыт!
Сандаара – Оксана Андросова