Альберт Семенович Егоров – Бүлүүйүскэй 80 сылыгар Зоя Григорьевна Кириллина төрөппүт оҕолорунаан таһааттарбыт «Уоттаах тыл сүмэтин хаалларан…» диэн саҥа кинигэтэ сүрэхтэннэ. Урут бэчээттэммэтэх 200-тэн тахса хоһоонноро, кэпсээннэрэ, талыллыбыт ыстатыйалара, биир дойдулаахтарын, чугас дьонун ахтыылара, 35 ырыа буолбут хоһоонноро киирбиттэр. Куйаар кодунан хоһоонноро, ырыалара, кини туһунан устуулар, биэриилэр, барыта – 14 видео киирбитэ кэрэхсэнэр. Бу курдук үйэлээх үлэ суруллубута , киэҥ эйгэҕэ тарҕаммыта дойдутун дьонугар-сэргэтигэр, кэлэр кэнчээри ыччакка улахан бэлэх уонна үйэтитии буолар.
Кинигэ сүрэхтэниитин тэрээһинигэр Күндэйэттэн анаан-минээн чугас аймахтара Егорова Маргарита уонна Маркиза Ивановналар, бииргэ алтыспыт атастара, доҕотторо кэлэн истиҥник ахтан, ырыаларын ыллаан олус киэргэттилэр. Кутанатааҕы «Ньургуһун» литературнай түмсүү актыыбынай кыттыыны ылла. Оскуола үөрэнээччилэрэ Альберт Бүлүүйскэй хоһооннорунан уус-уран дьүһүйүүнү иһитиннэрдилэр.
Биһиги, оҕолор, Кутанабыт сиригэр чахчы да талааннаах бэйээт төрөөн-үөскээн ааспыт эбит диэн киэн туттан, олус үөрэн тарҕастыбыт.
Анжелина Архангельская, 7 кыл. «Кутана кыымнара» медиа-киин.