Олунньу 12 күнүгэр Н.И.Шарин аатынан Дьокуускай куорат 39 №-дээх орто оскуолатыгар «Таптыыбын Сахам сирин» бырайыак түмүктүүр тэрээһинэ буолла.
Н.Е. Мординов-Амма Аччыгыйа аатынан «Кэскил» оҕо кыһатын сахалыы тылынан бэчээттэнэр «Бэлэм буол» сурунаал «Уоскулаҥ» рубрикатыгар Н.И.Шарин аатынан Дьокуускай куорат 39 №-дээх орто оскуолатын 7 «Д» кылааһын үөрэнээччилэрэ биир сыл устата кроссвордары оҥордулар. Салайааччылар — Софронова Зинаида Евсеевна, 7 «Д» кылаас салайааччыта, Ущницкая Александра Егоровна, педогагическай наука кандидата, Дьокуускай куорат 39 №-дээх орто оскуолатын ресурснай киин салайааччыта. Ситимнээх үлэ түмүгүнэн, оҕолор учууталларын, төрөппүттэрин кытта боппуруостары толкуйдаан уопсайа 13 кроссворду оҥордулар. Таайбараҥ тиэмэлэрэ ый суолтатынан саха норуотун үгэстэригэр олоҕуран, ханнык сүрүн бэлиэлэрдээҕинэн, уратын күннэрдээҕинэн көрөн оҥоһуллан бэчээттэннэ.Бу бырайыак оҕо толкуйдуур дьоҕура сайдарыгар, Саха сирин туһунан элбэҕи билэригэр көмөлөһөр. Ону тэҥэ, бэйэлэрин саастыылаахтарын кытта алтыһарыгар туһуланна, дьиэ кэргэни түмэр, көлүөнэни ситимниир.
Чичигинарова Ульяна Петровна, төрөппүт:
-«Бары биир сыаллаах-соруктаах үлэлээбиппит олус көмөлөөх буолла. Ый аайы ыйга аналлаах үгэс буоллун, тыл буоллун дьиэ кэргэнинэн оҕолорбутунуун оҥордубут. Ыйбыт түргэн баҕайытык кэлэн иһэрэ. Бары кылааһынан «Бэлэм буол» сурунаалга суруйтаран үлэбит таһаарыылаах буолла.»
Ушницкая Александра Егоровна, педогагическай наука кандидата, Дьокуускай куорат 39 №-дээх орто оскуола ресурснай киинин салайааччыта:
— «Сыалай улахан үлэни оҥорон таһаарар «Кэскил» оҕо бэчээтин кыһатыгар улахан махталбытын тиэрдэбит. Идеябытын тута ылыммыттара, ыйан-кэрдэн, сүбэлээн биэрбиттэрэ. Барыта түргэн-тарҕан баҕайытык табылынна. Кылаас салайааччытыгар барытын тэрийэн, тутан наһаа үчүгэй түмүктэргэ аҕалан испитигэр эмиэ махтанабыт.»
Бырайыакка үлэлэспит оҕолор бэйэлэрин санааларын эттилэр. Ол курдук, Данил Васильев бу бырайыагынан научнай-практическай конференцияҕа ситиһиилээктик кыттыбытын бэлиэтээтэ:
-«Биһиги бу бырайыагынан үлэлээлбиппит 2 сыл буолла. Бу бырайыагынан научнай-практическай конференцияҕа кыттан, Дьокуускайга I миэстэ, В.П. Ларионов аатынан өрөспүүбүлүкэтээҕи кэмпириэнсиэйэҕэ II миэстэ буолбутум. Аан бастаан, биһиги, оҕолор, төрөппүттэрбитиниин боппуруос толкуйдаан баран кроссворд оҥорон «Бэлэм буол» сурунаалга ыыппыппыт. Уопсайа холбоон 13 кроссворд буолла.»
Гермоганов Айсан:
-«Бу бырайыак саҥарар, булар-талар дьоҕурбутун сайыннарар, дьиэ кэргэнинэн киэһэ аайы мустан түмсүүлээхтик үлэлиирбитин көрдөрөр. Элбэх сахалыы тыллар суолталарын үөрэттибит, биллибит. Кылааһынан маннык бырайыакка үлэлиир олус үчүгэй эбит дии санаатым.»
Саха сирин араас улуустарыттан, Амматтан, Тааттаттан, Ньурбаттан о.д.а кроссворд эппиэттэрин ыыппыттара. Түмүгэр, саамай элбэхтэ кроссорду таайан ыыппыт кыайыылааҕынан Хаҥалас улууһун Дьөппөн санаторнай оскуола-интернат 8 кылааһын үөрэнээччитэ Строева Ира буолла.
Бырайыак манан түмүктэммэт. Салгыы сайдар, улаатар. Оҕолор учууталларын кытта таайбараҥнары түмэн хомуурунньук уонна «Түмэн» диэн дьиэ кэргэнинэн, кылааһынан ооньуурга аналлаах остуол оонньуутун оҥорбуттар.
Оонньуу карточкалардаах, песочнай чаһылаах, оонньуур «хонуулаах». Салгыы бу бырайыагы тарҕата, кэпсии муус устар ый саҕаланыыта Казахстан оскуолатын үөрэнээччилэригэр билии, доҕордоһуу «муостатын» олохтоору барарга бэлэмнэнэ сылдьаллар. Онон «уоскулаҥ» бырайыак барыбытын түмэр уонна ситимниир!
keskil14.ru