Биһиги нэһилиэкпитигэр Платон Ойуунускай аатынан Саха Академическай театрын артыыстара икки күн устата сэргэх киэһэлэри бэлэхтээтилэр.
Гастролларын Платон Алексеевич Слепцов-Ойуунускай төрөөбүтэ 130 үбүлүөйдээх сылыгар анаабыттар. Артыыстар олунньу ый 19 күнүттэн саҕалаан уһун айаҥҥа сылдьаллар эбит.
Уолбалар биир дойдулаахпытын артыыс Иван Еремеевич Попов төрөөбүт дойдутугар долгуйа, астына көрүстүбүт. Бастакы кэлбит күннэригэр сыананы киэргэтэн, туттар малларын-салларын бэлэмнээн, оскуола оҕолоругар маастар-кылаас ыыттылар. Манна кинилэр бэйэлэрин билиһиннэрбиттэрэ, реквизиттэрин көрдөрбүттэрэ. Үс улахан кылаас уолаттарын талан ылан Театр гримера кырааскалаан, таҥыннаран Былатыан Ойуунускайга, Алексей Елисеевич Кулаковскай — Өксөкүлээх Өлөксөйгө уонна Анемподист Иванович Софронов-Алампаҕа майгыннатан таһаарбыта.
Ол кэнниттэн киэһээ «Ийэ» диэн бастакы спектаклы көрдөрбүттэрэ. Киһини ытатар олус үчүгэй ис хоһоонноох спектакль этэ.
Онтон иккис күн «Оҕоҕо баҕарбыт» диэн комедияны көрдөрөн күллэрдилэр. Спектакль бүппүтүн кэннэ артыыстар нэһилиэкпит баһылыгар Александр Афанасьевич Винокуровка, кулууп дириэктэригэр Анастасия Сергеевна Боппосоваҕа үөрэ-көтө, минньигэс астаах, сылаастык көрсүбүттэрин иһин махтал суругу туттардылар.
Таатталар биир дойдулаахпыт Матрёна Христофорова кулууп үлэһиттэригэр бэйэтин аҕатын туһунан кинигэни бэлэхтээтэ. Баһылык Александр Афанасьевич кинилэргэ эмиэ бэйэтин сэмэй бэлэҕин Уолба туһунан кинигэни, сахалыы чороону бэлэхтээтэ.
Бары таптыыр артыыспытыгар Зоя Петровна Быгынановаҕа нэһилиэкпит уран тарбахтаах маастара Михаил Трофимович Боппосов сибэкки туттарда уонна тэтиҥ мастан оҥорбут массажтанар өтүйэтин бэлэхтээтэ.
Саха театрын Уолбаҕа гастрола өйдөбүнньүк хаартыскаҕа түһүүнэн уонна видеонан түмүктэннэ.
Мин бэйэм «Оҕоҕо баҕарбыт» диэн спектакылы ордук сөбүлээтим. Сахабыт артыыстарыгар махтанабыт.
Алёна ТАППЫРОВА, VI кылаас, Уолба, Таатта