Оскуолабыт остолобуойугар 7-11 кылаас уолаттара сыллата муус ылар үтүө үгэстээхпит. Ылбыт мууспутун Эбэ таҥнаан, ууга бараары гыммытын оскуола эр дьон учууталлара, техническэй үлэһиттэр киэһэ хараҥарыар дылы трактор 6 бырысыабынан тиэйэн оскуола остолобуойугар уонна оҕо саадыгар аҕалан сүөкээтилэр.
Хата, ылбыт мууспут ууга барбатаҕыттан биһиги, оҕолор, олус үөрдүбүт. Муус ылан, бастатан туран, сибиэһэй салгыҥҥа сырыттыбыт, иккиһинэн кыһыны быһа остолобуойга аһыыр аска хаһаанныбыт, үсүһүнэн учууталлары мууһунан хааччыйдыбыт.
Остолобуой асчыттара Татьяна Васильевна Романова, Сардаана Михайловна Семёнова сыл устата минньигэс, тотоойу аһынан аһатан доруобуйабыт үөрэхпит өссө тупсуо турдаҕа!
Сайаан Павлов, «Тымтык» эдкорпост, Ороһу.